ഇറാൻ നാവികസേനാ കപ്പലിന് കൊച്ചിയിൽ അടിയന്തര അഭയം; 183 നാവികർ സുരക്ഷിതർ

കൊച്ചി/ന്യൂഡല്‍ഹി:

അന്താരാഷ്ട്ര സമുദ്രപരിധിയിൽ ഇറാൻ-അമേരിക്ക സംഘർഷം മുറുകുന്നതിനിടെ, ഇറാന്റെ യുദ്ധക്കപ്പലായ ഐആർഐഎസ് ലാവന് (IRIS Lavan) കൊച്ചിയിൽ ഇന്ത്യ അടിയന്തര സുരക്ഷയൊരുക്കി. സാങ്കേതിക തകരാറുകളെത്തുടർന്ന് സഹായമഭ്യർത്ഥിച്ച കപ്പലിനും അതിലുണ്ടായിരുന്ന 183 നാവികർക്കുമാണ് ഇന്ത്യൻ നാവികസേന നിലവിൽ സംരക്ഷണം നൽകുന്നത്.

വിശാഖപട്ടണത്ത് നടന്ന രാജ്യാന്തര കപ്പൽപ്പട പ്രദർശനത്തിന് (MILAN) ശേഷം മടങ്ങുകയായിരുന്ന ലാവന് ഗുരുതരമായ തകരാറുകൾ സംഭവിക്കുകയായിരുന്നു. തുടർന്ന് ഇറാൻ നടത്തിയ നയതന്ത്ര നീക്കങ്ങൾക്കൊടുവിൽ ഫെബ്രുവരി 28-നാണ് ഇന്ത്യ സഹായം വാഗ്ദാനം ചെയ്തത്. മാർച്ച് 1-ന് ഔദ്യോഗിക അനുമതി ലഭിച്ചതോടെ മാർച്ച് 4-ന് കപ്പൽ സുരക്ഷിതമായി കൊച്ചി തീരത്തെത്തിച്ചു.

ഈ നയതന്ത്ര നീക്കങ്ങൾക്കിടയിലാണ് ശ്രീലങ്കൻ തീരത്ത് വെച്ച് ഇറാന്റെ മറ്റൊരു കപ്പലായ ഐആർഐഎസ് ദേന (IRIS Dena) അമേരിക്കൻ ആക്രമണത്തിൽ തകർക്കപ്പെട്ടത്. അന്താരാഷ്ട്ര തലത്തിൽ വലിയ ചർച്ചയായ ഈ സംഭവത്തിന് തൊട്ടുമുൻപാണ് ഇന്ത്യ ലാവന് അഭയം നൽകിയത് എന്നത് ശ്രദ്ധേയമാണ്. നിലവിൽ കൊച്ചിയിലെ നാവികസേനാ കേന്ദ്രത്തിൽ കഴിയുന്ന ഇറാൻ നാവികർ സുരക്ഷിതരാണെന്ന് അധികൃതർ അറിയിച്ചു. മേഖലയിലെ സമാധാനാന്തരീക്ഷം കണക്കിലെടുത്ത് അതീവ ജാഗ്രതയോടെയാണ് ഇന്ത്യ ഈ സാഹചര്യത്തെ കൈകാര്യം ചെയ്യുന്നത്.