കുവൈറ്റ് അമീർ അന്തരിച്ചു

കുവൈറ്റ് സിറ്റി:
കുവൈറ്റ് ഭരണാധികാരി അമീർ ഷെയ്ഖ് നവാഫ് അൽ അഹമ്മദ് അൽ ജാബർ അൽ സബാഹ് (86) അന്തരിച്ചു. 2020 സെപ്റ്റംബർ 30 നാണ് കുവൈറ്റിന്റെ പതിനാറാമത്തെ അമീറായി ഷെയ്ഖ് നവാഫ് അൽ അഹമ്മദ് അധികാരമേറ്റത്. 2006-ൽ അദ്ദേഹം കുവൈറ്റ് കിരീടാവകാശിയായിരുന്നു. 25-ാം വയസ്സിൽ ഹവല്ലി ഗവർണറായി ഭരണാധികാരമേറ്റ ഷെയ്ഖ് നവാഫ് 1978-ൽ ആഭ്യന്തര മന്ത്രിയായി. 1988 ൽ പ്രതിരോധ മന്ത്രിയായും 1991-ൽ തൊഴിൽ സാമൂഹിക മന്ത്രിയുമായും സേവനമനുഷ്ഠിച്ചിരുന്നു.ആറംഗ ഗൾഫ് രാജ്യങ്ങളുടെ ഐക്യ നിരയ്ക്ക് മികച്ച സംഭാവന നൽകിയ ഭരണാധികാരിയായിരുന്നു അദ്ദേഹം. അമീറിന്റെ നിര്യാണത്തെ തുടർന്ന് രാജ്യത്ത് 40 ദിവസത്തെ ദു:ഖാചരണം പ്രഖ്യാപിച്ചു. ഇന്ത്യയുമായി ഉന്നത സൗഹൃദബന്ധം സ്ഥാപിച്ച ഭരണാധികാരിയായിരുന്നു ഷെയ്ഖ് നവാഫ് അൽ അഹമ്മദ് അൽ ജാബർ.ഖബറടക്കം ബിലാൽ ബിൻ റബാഹ് മസ്ജിദിൽ നടക്കും. പുതിയ അമീറായി ഷെയ്ഖ് മിഷാൽ അൽ അഹമ്മദ് അൽ ജാബർ അൽ സബാഹിനെ മന്ത്രിസഭ തെരഞ്ഞെടുത്തു.