കൊല്ലത്ത് റെയിൽ പാളത്തിൽ ടെലിഫോൺ പോസ്റ്റിട്ട സംഭവം; രണ്ട് പ്രതികൾ പിടിയിൽ
കൊല്ലം കുണ്ടറയിൽ റെയിൽവേ പാലത്തിന് കുറുകെ ടെലിഫോൺ പോസ്റ്റ് കണ്ടെത്തിയ സംഭവത്തിൽ രണ്ടുപേരെ പൊലീസ് അറസ്റ്റ് ചെയ്തു. കുണ്ടറ സ്വദേശി രാജേഷ്, പെരുമ്പുഴ സ്വദേശി അരുൺ എന്നിവരെയാണ് അറസ്റ്റ് ചെയ്തത്.
കുണ്ടറ സ്റ്റേഷനിൽ ഇരുവരെയും ചോദ്യം ചെയ്തുവരികയാണ്. ക്രിമിനൽ പശ്ചാത്തലമുള്ള ആളുകളാണ് ഇരുവരും. ഇതിൽ ഒരാൾ പൊലീസുകാരനെ അക്രമിച്ച കേസിലും പ്രതിയാണ്. സംഭവത്തിൽ അട്ടിമറി സാധ്യതയും പൊലീസ് പരിശോധിക്കുന്നുണ്ട്. കൂടുതൽ പ്രതികൾ ഉണ്ടോ എന്നും അന്വേഷിക്കുന്നുണ്ട്. ഉന്നത പൊലീസ് ഉദ്യോഗസ്ഥരും മധുരയിൽ നിന്ന് റെയിൽവേ ക്രെെം ബ്രാഞ്ചും എത്തി പ്രതികളെ ചോദ്യം ചെയ്യും. കേന്ദ്ര ഏജൻസികളും സംഭവത്തെക്കുറിച്ച് പോലീസിനോട് വിവരങ്ങളാരാഞ്ഞിരുന്നു.
