കേരളത്തിൽ വോട്ടെടുപ്പ് ആരംഭിച്ചു
ഒന്നരമാസത്തെ വാശിയേറിയ പ്രചരണങ്ങൾ അവസാനിച്ചു.കേരളത്തിൽ വോട്ടെടുപ്പ് ആരംഭിച്ചു.രാവിലെ ഏഴ് മണി മുതൽ വൈകുന്നേരം ആറ് മണി വരെയാണ് വോട്ടെടുപ്പ്.രാവിലെ ആറ് മണിമുതൽ ബൂത്തുകളിൽ തിരക്കാണ്. വേനൽ ചൂടിൽ നിന്നും രക്ഷപെടുവാൻ വോട്ടർമാർ 7മണിക്ക് മുൻപ് തന്നെ തിരഞ്ഞെടുപ്പ് കേന്ദ്രങ്ങളിൽ എത്തി തുടങ്ങി.
20 മണ്ഡലങ്ങളിലായി 194 സ്ഥാനാർത്ഥികളാണ് മത്സര രംഗത്തുള്ളത്. 25231 ബൂത്തുകളിലായി വോട്ട് രേഖപ്പെടുത്താൻ 2.77 കോടി വോട്ടർമാരാണുള്ളത്. സംഘർഷ സാധ്യത കണക്കിലെടുത്ത് തിരുവനന്തപുരം, പത്തനംതിട്ട, തൃശൂർ, കാസർകോട് എന്നീ ജില്ലകളിൽ നിരോധനാജ്ഞ പ്രഖ്യാപിച്ചു. സുരക്ഷയൊരുക്കാൻ 66,303 പൊലീസുകാരെയും അധിക സുരക്ഷയ്‌ക്ക് 62 കമ്പനി കേന്ദ്രസേനയെയും നിയോഗിച്ചിട്ടുണ്ട്.
