വിദ്യാർത്ഥികളെ എസ്.ഐ.ആർ. ഡ്യൂട്ടിക്ക് ഉപയോഗിക്കാനുള്ള നീക്കം വിവാദത്തിൽ: എതിർപ്പുമായി വിദ്യാഭ്യാസമന്ത്രി

തിരുവനന്തപുരം:

പരീക്ഷകൾ ആസന്നമായിരിക്കെ, സ്‌പെഷ്യൽ ഇൻ്റൻസീവ് റിവിഷൻ (എസ്.ഐ.ആർ.) ഡ്യൂട്ടിക്കായി സ്കൂൾ വിദ്യാർത്ഥികളെ ഉപയോഗിക്കാനുള്ള നീക്കം വലിയ വിവാദമായി. വിദ്യാർത്ഥികളുടെ പഠനത്തെ ബാധിക്കുമെന്നതിനാൽ ഇത് അംഗീകരിക്കാനാവില്ലെന്ന് വിദ്യാഭ്യാസമന്ത്രി വി. ശിവൻകുട്ടി ശക്തമായ നിലപാടെടുത്തു.

എസ്.ഐ.ആർ. ജോലികൾ സമയബന്ധിതമായി പൂർത്തിയാക്കുന്നതിനായി എൻ.എസ്.എസ്., എൻ.സി.സി., സ്കൗട്ട്/ഗൈഡ്, സൗഹൃദ ക്ലബ്ബ്/വളണ്ടിയർമാർ എന്നിവരിൽ ഉൾപ്പെട്ട വിദ്യാർത്ഥികളുടെ പട്ടിക നൽകാൻ തഹസിൽദാരും ഒരു ഡെപ്യൂട്ടി കളക്ടറും ഉത്തരവിറക്കിയതാണ് നിലവിലെ പ്രശ്‌നങ്ങൾക്ക് വഴിതെളിയിച്ചത്. ഈ ഉത്തരവിനെതിരെ രക്ഷിതാക്കളും അധ്യാപകരും രംഗത്തെത്തിയിരുന്നു. എസ്.ഐ.ആർ. ജോലിയുമായി ബന്ധപ്പെട്ട് നേരത്തെ നിരവധി ആരോപണങ്ങൾ ഉയർന്നിട്ടുള്ളതും, ഒരു ആത്മഹത്യാ സംഭവം പോലും റിപ്പോർട്ട് ചെയ്തിട്ടുള്ളതും ഈ വിവാദത്തിൻ്റെ തീവ്രത വർദ്ധിപ്പിച്ചു.

വിദ്യാഭ്യാസ വകുപ്പിൻ്റെ നിലവിലുള്ള ഉത്തരവുകൾ മന്ത്രി ഓർമ്മിപ്പിച്ചു. ക്ലാസ് സമയത്ത് വിദ്യാർത്ഥികൾ ക്ലാസ് വിട്ട് പോകരുതെന്നും, ക്ലാസ് സമയത്ത് സ്കൂൾ കോമ്പൗണ്ടിനുള്ളിൽ പരിപാടികൾ നടത്തരുതെന്നും കർശന നിർദ്ദേശമുണ്ട്. “വിദ്യാഭ്യാസ അവകാശ നിയമം അനുസരിച്ച് കുട്ടികളുടെ ക്ലാസ് സമയം സംരക്ഷിക്കപ്പെടണം,” മന്ത്രി പറഞ്ഞു.

വിദ്യാഭ്യാസത്തെ ബാധിക്കുന്ന രീതിയിൽ ഒരു കാരണവശാലും ക്ലാസ് സമയത്ത് കുട്ടികളെ മറ്റ് പരിപാടികൾക്കായി കൊണ്ടുപോകാൻ സാധിക്കില്ലെന്നും, ഈ ഉത്തരവ് ശക്തമായി നിലനിൽക്കുന്നുണ്ടെന്നും അദ്ദേഹം കൂട്ടിച്ചേർത്തു.