ഫെംഗൽ ചുഴലിക്കാറ്റ് ശക്തിപ്രാപിച്ചു ;തമിഴ്നാട്ടിലേയും പുതുച്ചേരിയിലേയും തീരദേശ മേഖലകളിൽ റെഡ് അലർട്ട് പ്രഖ്യാപിച്ചു
ചെന്നൈ, ചെങ്കൽപ്പെട്ട്, കാഞ്ചീപുരം, തിരുവള്ളൂർ, എന്നിവിടങ്ങളിൽ ശക്തമായ മഴ ലഭിക്കും. കനത്തമഴയെ തുടർന്ന് തമിഴ്നാട്ടിലെ ചെന്നൈ, ചെങ്കൽപ്പെട്ട് എന്നിവയുൾപ്പെടെ വിവിധ ജില്ലകളിൽ സ്കൂളുകൾക്ക് അവധി പ്രഖ്യാപിച്ചിട്ടുണ്ട്
ബംഗാൾ ഉൾക്കടലിൽ രൂപംകൊണ്ട തീവ്രന്യൂനമർദം ഫെംഗൽ ചുഴലിക്കാറ്റ് ശക്തിപ്രാപിച്ചു. ഈ സാഹചര്യത്തിൽ തമിഴ്നാട്ടിലേയും പുതുച്ചേരിയിലേയും തീരദേശ മേഖലകളിൽ റെഡ് അലർട്ട് പ്രഖ്യാപിച്ചു. അടുത്ത മണിക്കൂറുകളിൽ ഇവിടെ ശക്തമായ മഴയ്ക്ക് സാദ്ധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ന്യൂനമർദമായി മാറിയ ഫെംഗൽ ചുഴലിക്കാറ്റ് വടക്ക് പടിഞ്ഞാറ് തമിഴ്‌നാട്ടിലേക്കും പുതുച്ചേരിയിലേക്കും നീങ്ങുമെന്ന് പ്രതീക്ഷിക്കുന്നു.
പുതുച്ചേരിയിൽ നിന്ന് ഏകദേശം 350 കിലോമീറ്റർ തെക്ക് കിഴക്കായി സ്ഥിതി ചെയ്യുന്ന ഈ ന്യൂനമർദ്ദം അടുത്ത മണിക്കൂറുകൾക്കുള്ളിൽ ചുഴലിക്കാറ്റായി മാറാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം മേധാവി ബാലചന്ദ്രൻ പറഞ്ഞു. മോശം കാലാവസ്ഥ പരിഗണിച്ച് തമിഴ്‌നാട് സർക്കാർ മുൻകരുതൽ നിർദ്ദേശങ്ങൾ പുറപ്പെടുവിച്ചിട്ടുണ്ട്.
ഇന്ന് ഉച്ചയോടെ രൂപംകൊണ്ട ചുഴലിക്കാറ്റ് നാളെ ഉച്ചയ്ക്കുശേഷം കാരയ്ക്കലിനും മഹാബലിപുരത്തിനും ഇടയിൽ കരതൊടും. മണിക്കൂറിൽ പരമാവധി 90 കിലോമീറ്റർ വരെ വേഗതയിൽ കരയിൽ പ്രവേശിക്കാനാണ് സാധ്യത. ചെന്നൈ, ചെങ്കൽപ്പെട്ട്, കാഞ്ചീപുരം, തിരുവള്ളൂർ, എന്നിവിടങ്ങളിൽ ശക്തമായ മഴ ലഭിക്കും. കനത്തമഴയെ തുടർന്ന് തമിഴ്നാട്ടിലെ ചെന്നൈ, ചെങ്കൽപ്പെട്ട് എന്നിവയുൾപ്പെടെ വിവിധ ജില്ലകളിൽ സ്കൂളുകൾക്ക് അവധി പ്രഖ്യാപിച്ചിട്ടുണ്ട്
