ശ്രീജേഷിന് അനുമോദനം നാളെ
തിരുവനന്തപുരം:
ഒളിമ്പിക്സിൽ രണ്ടാം തവണയും വെങ്കലമെഡൽ നേടിയ ഇന്ത്യൻ ഹോക്കിതാരം പി ആർ ശ്രീജേഷിന് ബുധനാഴ്ച വൈകിട്ട് 4 മണിക്ക് വെള്ളയമ്പലം ജിമ്മി ജോർജ് ഇൻഡോർ സ്റ്റേഡിയത്തിൽ സംസ്ഥാന സർക്കാർ സ്വീകരണം നൽകും. മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. സർക്കാർ പ്രഖ്യാപിച്ച രണ്ടുകോടി രൂപയുടെ പാരിതോഷികവും മുഖ്യമന്ത്രി സമ്മാനിക്കും. കായിക മന്ത്രി വി അബ്ദുറഹിമാൻ അധ്യക്ഷത വഹിക്കും. ഉച്ചയ്ക്ക് 3.30 ന് മാനവീയം വീഥിയുടെ പരിസരത്തുനിന്ന് ശ്രീജേഷിനെ സ്വീകരിച്ച് തുറന്ന ജീപ്പിലാണ് ജിമ്മി ജോർജ് ഇൻഡോർ സ്റ്റേഡിയത്തിലേക്ക് കൊണ്ടുവരിക. സ്കൂൾ ബാൻഡ് സംഘങ്ങളും, ജി വി രാജ സ്പോർട്സ് സ്കൂൾ, സ്പോർട്സ് കൗൺസിൽ ഹോസ്റ്റലുകൾ, വിവിധ വിദ്യാഭ്യാസ സ്ഥാപനങ്ങൾ എന്നിവിടങ്ങളിലെ വിദ്യാർഥികളും അകമ്പടിയേകും. മന്ത്രിമാരും, അന്താരാഷ്ട്ര, ദേശീയ കായിക താരങ്ങളും,കായിക അസോസിയേഷൻ പ്രതിനിധികളും പങ്കെടുക്കും.
