ചെങ്കോട്ട സ്ഫോടനം: വിദേശ ഭീകരബന്ധം സ്ഥിരീകരിച്ചു; ഞെട്ടിക്കുന്ന വിവരങ്ങൾ പുറത്ത്; അൽഫലാ സർവകലാശാല ED വലയിൽ!

ന്യൂഡൽഹിയെ ഞെട്ടിച്ച ചെങ്കോട്ട സ്ഫോടനക്കേസിൽ വിദേശ ഭീകര ഗ്രൂപ്പുകളുടെ സഹായം ലഭിച്ചതായി അന്വേഷണ സംഘത്തിന്റെ നിർണ്ണായക കണ്ടെത്തൽ. സ്ഫോടനത്തിന് പിന്നിൽ പ്രവർത്തിച്ചവർക്ക് വിദേശത്തുള്ള ഭീകരരുമായി നിരന്തര ബന്ധമുണ്ടായിരുന്നു എന്നാണ് അന്വേഷണത്തിൽ തെളിഞ്ഞത്.

• അതിർത്തി കടന്നുള്ള ബന്ധങ്ങൾ: പാക് അധീന കശ്മീർ (PoK), അഫ്ഗാനിസ്ഥാൻ എന്നീ പ്രദേശങ്ങളിൽ നിന്ന് ഇന്ത്യയിലേക്ക് സ്ഥിരമായി ഫോൺകോളുകൾ എത്തിയിരുന്നു.
• ഡിജിറ്റൽ തെളിവുകൾ: സ്ഫോടനത്തിന്റെ മുഖ്യ സൂത്രധാരനായ ചാവേർ ഉമർ നബി ഉൾപ്പെടെയുള്ളവർ ഭീകരർ തുടങ്ങിയ പ്രത്യേക ടെലഗ്രാം ഗ്രൂപ്പിൽ സജീവമായിരുന്നു.
• സാമ്പത്തിക നിയന്ത്രണം: കേസുമായി ബന്ധപ്പെട്ട് കസ്റ്റഡിയിലുള്ളവരുടെ ബാങ്ക് അക്കൗണ്ടുകൾ അന്വേഷണ സംഘം മരവിപ്പിച്ചു.

എൻ.ഐ.എ. വലവിരിച്ച് അന്വേഷണം:

ഉമർ നബിയുമായി ബന്ധമുള്ള കൂടുതൽ പേരെ കണ്ടെത്താൻ എൻഐഎ (NIA) തീവ്രശ്രമം തുടങ്ങി. കഴിഞ്ഞ ഒരു മാസത്തിനിടെ ഉമർ നബി ഫോണിൽ ബന്ധപ്പെട്ടവരെ കേന്ദ്രീകരിച്ചാണ് അന്വേഷണ ഏജൻസികൾ ഇപ്പോൾ ശ്രദ്ധ കേന്ദ്രീകരിക്കുന്നത്.

കൂടാതെ, അൽഫലാ സർവകലാശാലയിലെ ഡോക്ടർമാർ അടക്കമുള്ള 200 ജീവനക്കാർ അന്വേഷണ ഏജൻസികളുടെ കടുത്ത നിരീക്ഷണത്തിലാണ്. സ്ഫോടനത്തിന് ശേഷം ക്യാമ്പസിൽ നിന്ന് പോയവരെ കണ്ടെത്താനുള്ള ശ്രമങ്ങൾ ഊർജ്ജിതമാക്കിയിരിക്കുകയാണ്.

അൽഫലാ സർവകലാശാല ചെയർമാൻ അറസ്റ്റിൽ:

ചെങ്കോട്ട സ്ഫോടനത്തിനു പിന്നാലെ, അൽഫലാ സർവകലാശാലയിലും എൻഫോഴ്‌സ്‌മെന്റ് ഡയറക്ടറേറ്റ് (ED) പിടിമുറുക്കി. സർവകലാശാലാ ചെയർമാൻ ജാവേദ് അഹമ്മദ് സിദ്ദിഖിയെ ഇ.ഡി. അറസ്റ്റ് ചെയ്തു. ഇതിന് മുന്നോടിയായി, അൽഫലാ സർവകലാശായുമായി ബന്ധപ്പെട്ട 25 കേന്ദ്രങ്ങളിൽ ഇ.ഡി. റെയ്ഡ് നടത്തിയിരുന്നു.

ഞെട്ടിച്ച ഡയറിക്കുറിപ്പുകൾ:

സ്ഫോടനത്തിൽ കൊല്ലപ്പെട്ട ചാവേർ ഡോക്ടർ ഉമർ നബിയുടെയും ഫരീദാബാദിൽ അറസ്റ്റിലായ മുസമിലിന്റെയും അൽ ഫലാഹ് യൂണിവേഴ്‌സിറ്റിയിലെ മുറികളിൽ നിന്ന് പിടിച്ചെടുത്ത ഡയറിക്കുറിപ്പുകൾ രാജ്യത്തെ ഞെട്ടിച്ചിരുന്നു. രാജ്യവ്യാപകമായി ഒരു വലിയ സ്ഫോടന പരമ്പര ആസൂത്രണം ചെയ്തതിന്റെ ഞെട്ടിക്കുന്ന വിവരങ്ങളാണ് ആ ഡയറികളിൽ ഉണ്ടായിരുന്നത്.