ഇമ്രാൻ ഖാൻ കൊല്ലപ്പെട്ടതായി അഭ്യൂഹം: ഔദ്യോഗിക സ്ഥിരീകരണമില്ലാതെ ആശങ്ക
റാവൽപിണ്ടി: പാകിസ്താൻ മുൻ പ്രധാനമന്ത്രി ഇമ്രാൻ ഖാൻ കൊല്ലപ്പെട്ടതായി ശക്തമായ അഭ്യൂഹങ്ങൾ പ്രചരിക്കുന്നു. 2023 മുതൽ റാവൽപിണ്ടിയിലെ അഡിയാല ജയിലിൽ തടവിലാണ് അദ്ദേഹം.
മുൻ പാക് പ്രധാനമന്ത്രി അഡിയാല ജയിലിൽ ‘കൊല്ലപ്പെട്ടു’ എന്ന് ബന്ധപ്പെട്ട സ്രോതസ്സുകളിൽ നിന്ന് വിവരം ലഭിച്ചതായി അഫ്ഗാൻ ടൈംസ് എന്ന എക്‌സ് (മുമ്പ് ട്വിറ്റർ) അക്കൗണ്ട് അവകാശപ്പെട്ടതിനെ തുടർന്നാണ് ഈ അഭ്യൂഹങ്ങൾ വ്യാപിച്ചത്. എന്നാൽ, ഈ റിപ്പോർട്ട് സംബന്ധിച്ച് പാകിസ്താൻ സർക്കാരിൽ നിന്നോ ജയിൽ അധികൃതരിൽ നിന്നോ ഔദ്യോഗികമായ സ്ഥിരീകരണങ്ങളൊന്നും ഇതുവരെ ലഭിച്ചിട്ടില്ല.
ഇമ്രാൻ ഖാനെ കാണാൻ കുടുംബാംഗങ്ങളെ അനുവദിക്കുന്നില്ലെന്നും അദ്ദേഹത്തെ ഏകാന്ത തടവിൽ പാർപ്പിച്ചിരിക്കുകയാണെന്നും നേരത്തെ റിപ്പോർട്ടുകൾ വന്നിരുന്നു. ഇതിന് തൊട്ടുപിന്നാലെയാണ് മരണവാർത്തകൾ പുറത്തുവരുന്നത്. അഡിയാല ജയിലിന് പുറത്ത് പ്രതിഷേധ പ്രകടനം നടത്തിയ അദ്ദേഹത്തിന്റെ സഹോദരിമാരെ കൈയേറ്റം ചെയ്തതായും റിപ്പോർട്ടുണ്ട്. അഭ്യൂഹങ്ങൾ പാകിസ്താനിലെ രാഷ്ട്രീയ രംഗത്ത് വലിയ ആശങ്ക സൃഷ്ടിച്ചിട്ടുണ്ട്. ഔദ്യോഗിക വിശദീകരണം ഉടൻ ഉണ്ടാകുമെന്നാണ് പ്രതീക്ഷിക്കുന്നത്.
