ഇസ്രോയ്ക്ക് വൻ തിരിച്ചടി; പിഎസ്എൽവി-സി62 ദൗത്യം പരാജയപ്പെട്ടു, 16 ഉപഗ്രഹങ്ങൾ നഷ്ടമായി

ശ്രീഹരിക്കോട്ട:

ഇന്ത്യൻ ബഹിരാകാശ ഗവേഷണ സംഘടനയായ ഇസ്രോയുടെ (ISRO) ഏറ്റവും വിശ്വസ്തമായ വിക്ഷേപണ വാഹനമായ പിഎസ്എൽവിയുടെ സി62 (PSLV-C62) ദൗത്യം പരാജയപ്പെട്ടു. ഇതോടെ ഇന്ത്യയുടെയും വിവിധ വിദേശ രാജ്യങ്ങളുടെയുമായി 16 ഉപഗ്രഹങ്ങൾ ബഹിരാകാശത്ത് നഷ്ടമായി. ഇന്ത്യയുടെ ബഹിരാകാശ സ്വപ്നങ്ങൾക്ക് കനത്ത പ്രഹരമേൽപ്പിച്ച ഈ പരാജയം ഇന്ന് (ജനുവരി 12) രാവിലെയാണ് സംഭവിച്ചത്.

ഇന്ന് രാവിലെ 10:17-ന് ശ്രീഹരിക്കോട്ടയിലെ വിക്ഷേപണ തറയിൽ നിന്ന് ഇടിമുഴക്കത്തോടെ കുതിച്ചുയർന്ന 260 ടൺ ഭാരമുള്ള പി‌എസ്‌എൽ‌വി-ഡി‌എൽ വകഭേദം ആദ്യ രണ്ട് ഘട്ടങ്ങളിൽ കൃത്യമായ പ്രകടനം കാഴ്ചവെച്ചിരുന്നു. എന്നാൽ, മൂന്നാം ഘട്ട ജ്വലനത്തിന് ശേഷം ദൗത്യ നിയന്ത്രണ കേന്ദ്രവുമായുള്ള ബന്ധം നഷ്ടപ്പെടുകയും നിശബ്ദത തളംകെട്ടുകയുമായിരുന്നു. കഴിഞ്ഞ വർഷം നടന്ന PSLV-C61 പരാജയത്തിന് സമാനമായ രീതിയിൽ, ഉപഗ്രഹങ്ങളെ ഭ്രമണപഥത്തിൽ എത്തിക്കുന്നതിൽ വാഹനം പരാജയപ്പെട്ടതായി പിന്നീട് സ്ഥിരീകരിച്ചു.

പരാജയ കാരണം വിശകലനം ചെയ്യുന്നു

മൂന്നാം ഘട്ടത്തിന്റെ അവസാനത്തോടെ വാഹനത്തിൻ്റെ നിയന്ത്രണത്തിൽ മാറ്റങ്ങൾ സംഭവിക്കുകയും നിശ്ചിത പാതയിൽ നിന്ന് വ്യതിയാനം ഉണ്ടാവുകയും ചെയ്തതായി ഇസ്രോ മേധാവി വി. നാരായണൻ സ്ഥിരീകരിച്ചു. “വാഹനത്തിൻ്റെ റോൾ നിരക്കുകളിൽ അസ്വസ്ഥതയും പറക്കൽ പാതയിൽ മാറ്റവും ശ്രദ്ധയിൽപ്പെട്ടു. നിലവിൽ ഡാറ്റ വിശകലനം ചെയ്തുവരികയാണ്,” അദ്ദേഹം വ്യക്തമാക്കി.

ഇസ്രോയുടെ ചരിത്രത്തിലെ തന്നെ നിർണ്ണായകമായ ഒരു ദൗത്യമായിരുന്നു സി62. വിക്ഷേപണം കാണാൻ രാജ്യമെമ്പാടും ആകാംക്ഷയോടെ കാത്തിരുന്ന ആയിരക്കണക്കിന് ആളുകളെ നിരാശയിലാഴ്ത്തിയാണ് ദൗത്യം പരാജയപ്പെട്ട വാർത്ത പുറത്തുവന്നത്. പരാജയത്തെക്കുറിച്ച് പഠിക്കാൻ വിദഗ്ധ സമിതിയെ നിയോഗിക്കുമെന്ന് അധികൃതർ അറിയിച്ചു.