തിരഞ്ഞെടുപ്പ് ചട്ടലംഘനം: പേരാമ്പ്രയിലെ എൽ.ഡി.എഫ് സ്ഥാനാർത്ഥിക്ക് നോട്ടീസ്
കോഴിക്കോട്:
പേരാമ്പ്ര മണ്ഡലത്തിലെ എൽ.ഡി.എഫ് പ്രചാരണ വാഹനത്തിലൂടെ വിവാദപരമായ അനൗൺസ്മെന്റ് നടത്തിയ സംഭവത്തിൽ സ്ഥാനാർത്ഥി ടി.പി. രാമകൃഷ്ണന് തിരഞ്ഞെടുപ്പ് കമ്മീഷൻ നോട്ടീസ് നൽകി. യു.ഡി.എഫ് നൽകിയ പരാതി പരിഗണിച്ച വരണാധികാരി കൂടിയായ ഡെപ്യൂട്ടി കളക്ടർ അജിത് ജോണാണ് നടപടിയെടുത്തത്.
നാല് ദിവസം മുൻപ് പേരാമ്പ്രയിൽ എൽ.ഡി.എഫ് പ്രചാരണ വാഹനം നടത്തിയ അനൗൺസ്മെന്റാണ് വിവാദത്തിന് ആധാരം. “ഖൗമിലെ കുട്ടിയെ (സമുദായത്തിലെ കുട്ടി) വിജയിപ്പിക്കണമെന്ന് മുസ്ലിം ലീഗുകാർ വീടുകളിൽ കയറി പറയുന്നു” എന്നതായിരുന്നു പ്രചാരണത്തിന്റെ ഉള്ളടക്കം. ഇത് മതസ്പർധ വളർത്തുന്നതും തിരഞ്ഞെടുപ്പ് പെരുമാറ്റച്ചട്ടത്തിന്റെ ലംഘനവുമാണെന്ന് യു.ഡി.എഫ് ആരോപിച്ചു.
വടകരയിലെ ‘കാഫിർ’ വിവാദത്തിന് സമാനമായ രീതിയിൽ പേരാമ്പ്രയിലെ മതസൗഹാർദ്ദം തകർക്കാനും വർഗീയ വിദ്വേഷം പ്രചരിപ്പിക്കാനും ഇടത് മുന്നണി ബോധപൂർവം ശ്രമിക്കുകയാണെന്ന് യു.ഡി.എഫ് പരാതിയിൽ ചൂണ്ടിക്കാട്ടി. സംഭവത്തിൽ സ്ഥാനാർത്ഥിയുടെ വിശദീകരണം തേടിയിരിക്കുകയാണ് തിരഞ്ഞെടുപ്പ് വിഭാഗം.
