ബ്രിട്ടനിലേക്ക് ചേക്കേറാൻ ‘ക്ലോഡ്’; ആന്ത്രോപ്പിക്കിനെ സ്വന്തമാക്കാൻ വമ്പൻ ഓഫറുകളുമായി യുകെ സർക്കാർ
ലണ്ടൻ:
ലോകപ്രശസ്ത ആർട്ടിഫിഷ്യൽ ഇന്റലിജൻസ് ആപ്പായ ‘ക്ലോഡിന്റെ’ (Claude) നിർമ്മാതാക്കളായ ആന്ത്രോപ്പിക്കിനെ (Anthropic) തങ്ങളുടെ രാജ്യത്തേക്ക് ആകർഷിക്കാൻ വമ്പൻ നീക്കങ്ങളുമായി ബ്രിട്ടൻ. യുഎസ് പ്രതിരോധ വകുപ്പും ആന്ത്രോപ്പിക്കും തമ്മിലുള്ള അസ്വാരസ്യങ്ങൾ മുതലെടുത്ത് കമ്പനിയുടെ പ്രവർത്തനം യുകെയിലേക്ക് വ്യാപിപ്പിക്കാനാണ് ബ്രിട്ടീഷ് സർക്കാർ ലക്ഷ്യമിടുന്നത്.
ആന്ത്രോപ്പിക്കിനായി ആകർഷകമായ നിരവധി വാഗ്ദാനങ്ങളാണ് ബ്രിട്ടൻ മുന്നോട്ടുവെച്ചിരിക്കുന്നത്. ലണ്ടനിലെ ഓഫീസ് വിപുലീകരണം മുതൽ ലണ്ടൻ സ്റ്റോക്ക് എക്സ്ചേഞ്ചിൽ ഇരട്ട ലിസ്റ്റിംഗ് (Dual Stock Listing) വരെയുള്ള കാര്യങ്ങൾ ചർച്ചയിലുണ്ടെന്ന് ഫിനാൻഷ്യൽ ടൈംസ് റിപ്പോർട്ട് ചെയ്തു. എഐ മേഖലയിൽ ലോകശക്തിയായി മാറാനുള്ള ബ്രിട്ടന്റെ നീക്കങ്ങളുടെ ഭാഗമായാണ് ഈ നടപടി.
അമേരിക്കൻ സ്റ്റാർട്ടപ്പായ ആന്ത്രോപ്പിക്കിനെ സംബന്ധിച്ചിടത്തോളം, ലണ്ടനിലെ മികച്ച നിക്ഷേപ സൗഹൃദ അന്തരീക്ഷം ഗുണകരമാകുമെന്നാണ് വിലയിരുത്തൽ. എഐ സാങ്കേതികവിദ്യയുടെ വികസനത്തിലും നിയന്ത്രണത്തിലും ആഗോള തലത്തിൽ നിർണ്ണായക പങ്കുവഹിക്കാൻ ബ്രിട്ടൻ തയ്യാറെടുക്കുന്നതിനിടെയാണ് ഈ നീക്കം. വരും ദിവസങ്ങളിൽ ഇത് സംബന്ധിച്ച് കൂടുതൽ ഔദ്യോഗിക സ്ഥിരീകരണങ്ങൾ ഉണ്ടായേക്കും.
