ഗുരുവായൂർ ഏകാദശി: ട്രെയിൻ യാത്രാദുരിതം തുടരുന്നു; ദക്ഷിണ റെയിൽവേ നടപടിയെടുക്കുന്നില്ല

റിപ്പോർട്ട്‌ :നന്ദു ഗുരുവായൂർ

​തൃശ്ശൂർ:

പ്രസിദ്ധമായ ഗുരുവായൂർ ഏകാദശി മഹോത്സവം സമാപിച്ചതിന് പിന്നാലെ, മടങ്ങിപ്പോകുന്ന തീർത്ഥാടകരെ യാത്രാദുരിതത്തിലാക്കി ദക്ഷിണ റെയിൽവേയുടെ അനാസ്ഥ. ലക്ഷക്കണക്കിന് ഭക്തജനങ്ങൾ പങ്കെടുത്ത ഉത്സവത്തിന് ശേഷം ഉച്ചയോടെ ആയിരക്കണക്കിന് പേർക്ക് ആശ്രയിക്കാൻ ആകെയുള്ളത് ഗുരുവായൂരിൽ നിന്ന് എറണാകുളത്തേക്കുള്ള പാസഞ്ചർ ട്രെയിൻ മാത്രമാണ്.

​യാത്രക്കാരുടെ എണ്ണം പരിധിയിലധികം വർധിച്ചിട്ടും, തിരക്ക് നിയന്ത്രിക്കാൻ ആവശ്യമായ അധിക സർവീസുകളോ കൂടുതൽ കോച്ചുകളോ ഏർപ്പെടുത്താൻ റെയിൽവേ ഇതുവരെ തയ്യാറായിട്ടില്ല. ഉച്ചസമയത്തെ ഗുരുവായൂർ-എറണാകുളം പാസഞ്ചർ ട്രെയിനിൽ (നമ്പർ 06019/06020) കാലുകുത്താൻ പോലും സ്ഥലമില്ലാത്ത അവസ്ഥയിലായിരുന്നു ഭക്തജനങ്ങൾ. ജനറൽ കോച്ചുകളിലും ലേഡീസ് കോച്ചുകളിലും തിരക്ക് കാരണം ശ്വാസം മുട്ടുന്ന സാഹചര്യമുണ്ടായി. വയോധികരും കുട്ടികളും സ്ത്രീകളുമടക്കമുള്ള യാത്രക്കാർ മണിക്കൂറുകളോളം തിക്കിത്തിരക്കിയാണ് യാത്ര ചെയ്തത്.

​ഏകാദശി പോലുള്ള പ്രധാന ഉത്സവ വേളകളിൽ യാത്രാസൗകര്യം മെച്ചപ്പെടുത്തുന്നതിൽ ദക്ഷിണ റെയിൽവേയുടെ ഭാഗത്ത് നിന്നുണ്ടായ ഗുരുതരമായ വീഴ്ചയിൽ ഭക്തജനങ്ങളും വിവിധ സംഘടനകളും ശക്തമായ പ്രതിഷേധം രേഖപ്പെടുത്തി. മുൻകൂട്ടി ആസൂത്രണം ചെയ്ത് സ്പെഷ്യൽ ട്രെയിനുകളോ നിലവിലുള്ള ട്രെയിനുകളിൽ കൂടുതൽ കോച്ചുകളോ അനുവദിച്ചിരുന്നെങ്കിൽ ഈ യാത്രാദുരിതം ഒഴിവാക്കാമായിരുന്നു.

​ഈ ഗുരുതരമായ പ്രശ്നം ശ്രദ്ധയിൽപ്പെടുത്തിയിട്ടും റെയിൽവേ അധികൃതർ നിസംഗത പാലിക്കുകയാണെന്നും, ദീർഘദൂര യാത്രക്കാർക്ക് പോലും സീറ്റുകൾ ലഭിക്കാതെ ദുരിതത്തിലായെന്നും യാത്രക്കാർ പരാതിപ്പെട്ടു. റെയിൽവേയുടെ ഈ നടപടി ലക്ഷക്കണക്കിന് ഭക്തജനങ്ങളോടുള്ള വെല്ലുവിളിയാണെന്നും വിമർശനമുയരുന്നുണ്ട്.