കോൺഗ്രസ് മഹാ പഞ്ചായത്തിൽ അതൃപ്തി; രാഹുലിന്റെ പ്രസംഗത്തിനിടെ വേദിവിട്ട് ശശി തരൂർ
കൊച്ചി:
കൊച്ചിയിൽ നടന്ന കോൺഗ്രസ് മഹാ പഞ്ചായത്ത് വേദിയിൽ പരസ്യമായി അതൃപ്തി പ്രകടിപ്പിച്ച് ശശി തരൂർ എംപി. രാഹുൽ ഗാന്ധി മുഖ്യാതിഥിയായി പങ്കെടുത്ത പരിപാടി അവസാനിക്കുന്നതിന് മുൻപേ തരൂർ വേദി വിട്ടിറങ്ങിയത് പാർട്ടി വൃത്തങ്ങളിൽ ചർച്ചയായിരിക്കുകയാണ്.
രാഹുൽ ഗാന്ധി തന്റെ പ്രസംഗത്തിന്റെ തുടക്കത്തിൽ വേദിയിലുണ്ടായിരുന്ന പ്രമുഖ നേതാക്കളുടെ പേര് പരാമർശിച്ചപ്പോൾ ശശി തരൂരിന്റെ പേര് മാത്രം ഒഴിവാക്കിയിരുന്നു. തന്നെ മാത്രം അവഗണിച്ചതിൽ പ്രതിഷേധിച്ചാണ് രാഹുൽ പ്രസംഗിച്ചുകൊണ്ടിരിക്കെ തന്നെ തരൂർ ഇറങ്ങിപ്പോയത്. കൂടാതെ, രാഹുൽ എത്തുന്നതിന് മുൻപുള്ള ‘പൈലറ്റ് പ്രസംഗകനായി’ മാത്രം തന്നെ ഒതുക്കിയതിലും അദ്ദേഹത്തിന് കടുത്ത പരിഭവമുണ്ട്.
സംഭവത്തിൽ എഐസിസി ജനറൽ സെക്രട്ടറി കെ.സി. വേണുഗോപാൽ, കേരളത്തിന്റെ ചുമതലയുള്ള ദീപാ ദാസ് മുൻഷി എന്നിവരെ തരൂർ നേരിട്ട് പ്രതിഷേധം അറിയിച്ചു. കെപിസിസി നേതൃത്വത്തിന്റെ ഭാഗത്തുനിന്നുണ്ടായ ബോധപൂർവ്വമായ അവഗണനയാണിതെന്നാണ് തരൂർ പക്ഷത്തിന്റെ ആരോപണം. എന്നാൽ വിഷയത്തിൽ ഔദ്യോഗിക പ്രതികരണത്തിന് പാർട്ടി നേതൃത്വം ഇതുവരെ തയ്യാറായിട്ടില്ല.
