നിതിൻ ജാംദാർ കേരള ഹൈക്കോടതി ചീഫ് ജസ്റ്റിസ്
ന്യൂഡൽഹി:
ബോംബെ ഹൈക്കോടതിയിലെ സീനിയർ ജഡ്ജ് നിതിൻ മധുകർ ജാംദാറിനെ കേരള ഹൈക്കോടതി ചീഫ് ജസ്റ്റിസായി നിയമിച്ചു. ജൂലൈ 11 ന് സുപ്രീംകോടതി കൊളി ജിയം നൽകിയ ശുപാർശ അംഗീകരിക്കാതെ കേന്ദ്രസർക്കാർ നിയമനം വൈകിപ്പിക്കുകയായിരുന്നു. കേന്ദ്ര സർക്കാരിന്റെ ഉദാസീനതയെ കഴിഞ്ഞ ദിവസം സുപ്രീംകോടതി രൂക്ഷമായി വിമർശിച്ചിരുന്നു. തൊട്ടുപിന്നാലെയാണ് നിയമനം അംഗീകരിച്ച് കേന്ദ്രം ഉത്തരവിറക്കിയത്. 2023 മെയ് മുതൽ ബോംബെ ഹൈക്കോടതി ആക്റ്റിങ് ചീഫ് ജസ്റ്റിസാണ്. മഹാരാഷ്ട്രയിലെ സോലാപൂരിൽ അഭിഭാഷക കുടുംബത്തിലാണ് ജനനം. മുംബൈ ലോ കോളേജിൽ നിയമ പഠനം പൂർത്തിയാക്കി. 2012 ൽ ബോംബെ ഹൈക്കോടതി ജസ്റ്റിസായി.
