ശുഭാൻശു ശുക്ല ബഹിരാകാശ നിലയത്തിലേക്ക്
ന്യൂഡൽഹി:
അന്താരാഷ്ട്ര നിലയത്തിലേക്ക് ആദ്യമായി ഒരു ഇന്ത്യാക്കാരൻ ഈ വർഷം യാത്ര തിരിക്കും. വ്യോമസേന ഗ്രൂപ്പ് ക്യാപ്റ്റൻ ശുഭാൻശു ശുക്ല(39)യാണ് നാലു പതിറ്റാണ്ടിനുശേഷം ബഹിരാകാശയാത്രയിൽ പുതു ചരിത്രമെഴുതാനിറങ്ങുന്ന ഇന്ത്യാക്കാരൻ. മനുഷ്യനെ ബഹിരാകാശത്ത് എത്തിക്കാനുള്ള ഇന്ത്യയുടെ ആദ്യ പദ്ധതിയായ ഗഗൻയാനിലേക്ക് തെരഞ്ഞെടുക്കപ്പെട്ട നാലുപേരിൽ ഒരാളാണ് യുപി സ്വദേശി ശുഭാൻശു. 1984 ൽ വിങ് കമാൻഡർ രാകേഷ് ശർമ ബഹിരാകാശ യാത്ര നടത്തിയ ശേഷം ആദ്യമായാണ് ഒരിന്ത്യാക്കാരൻ ബഹിരാകാശ ദൗത്യത്തിന് തെരഞ്ഞെടുക്കപ്പെടുന്നത്.
