ട്രംപിന്റെ സാമ്പത്തിക ഭീഷണി തള്ളി ഇറാൻ; ഇസ്രായേലിനെ അപലപിച്ച് യൂറോപ്യൻ രാജ്യങ്ങൾ
abbas agarachi
ടെഹ്റാൻ / ഗാസ സിറ്റി :
പശ്ചിമേഷ്യയിൽ നയതന്ത്ര, മാനുഷിക പ്രതിസന്ധികൾ തീവ്രമായി തുടരുന്നതിനിടെ യു.എസിനും ഇസ്രായേലിനുമെതിരെ രൂക്ഷവിമർശനവുമായി ഇറാനും അന്താരാഷ്ട്ര സംഘടനകളും രംഗത്തെത്തി. ഇറാന് മേൽ കടുത്ത സാമ്പത്തിക ഉപരോധങ്ങളും ഉപരോധഭീഷണികളും ചുമത്തുമെന്ന യു.എസ് പ്രസിഡന്റ് ഡൊണാൾഡ് ട്രംപിന്റെ മുന്നറിയിപ്പിനെ ഇറാൻ വിദേശകാര്യമന്ത്രി അബ്ബാസ് അരാഗ്ചി ശക്തമായി തള്ളി. ഇത്തരം “പരാജയപ്പെട്ട നയങ്ങൾ” ഇറാനിയൻ ജനതയ്ക്കിടയിൽ കൂടുതൽ ശത്രുത വളർത്താനേ ഉപകരിക്കൂ എന്ന് അദ്ദേഹം വ്യക്തമാക്കി.
അതേസമയം, ഫലസ്തീൻ പ്രദേശങ്ങളിൽ പുതിയ സെറ്റിൽമെന്റ് പദ്ധതി നടപ്പാക്കാനുള്ള ഇസ്രായേൽ നീക്കത്തെ ആറ് യൂറോപ്യൻ രാജ്യങ്ങൾ സംയുക്തമായി അപലപിച്ചു. ഗാസയിൽ തങ്ങളുടെ ജീവനക്കാർ കൊല്ലപ്പെട്ട രണ്ട് ആക്രമണങ്ങളിൽ ക്രിമിനൽ അന്വേഷണം നടത്തേണ്ടതില്ലെന്ന ഇസ്രായേൽ സൈന്യത്തിന്റെ തീരുമാനത്തിനെതിരെ അതിർത്തികളില്ലാത്ത ഡോക്ടർമാർ (MSF) സംഘടനയും രംഗത്തെത്തിയിട്ടുണ്ട്. സ്വതന്ത്രമായ അന്താരാഷ്ട്ര അന്വേഷണം വേണമെന്ന് അവർ ആവശ്യപ്പെട്ടു.
മൂന്ന് വർഷം മുമ്പ് ഇസ്രായേൽ വ്യോമാക്രമണത്തിൽ കൊല്ലപ്പെടുകയും അടുത്തിടെ മൃതദേഹാവശിഷ്ടങ്ങൾ വീണ്ടെടുക്കുകയും ചെയ്ത 50 ഓളം പേർക്കായി ഗാസ സിറ്റിയിൽ വൻ ജനപങ്കാളിത്തത്തോടെ കൂട്ട ഖബറടക്കം നടന്നു.
