പ്രതികൾ കോടതിയിൽ കീഴടങ്ങണം
കൊച്ചി:
കാസർകോട് റിയാസ് മൗലവി വധക്കേസിൽ ആർഎസ്എസ് പ്രവർത്തകരായ പ്രതികൾ കോടതിയിൽ കീഴടങ്ങി ജാമ്യമെടുക്കണമെന്ന് ഹൈക്കോടതി. പ്രതികളെ വെറുതെവിട്ട സെഷൻസ് കോടതി ഉത്തരവിനെതിരെ സർക്കാർ നൽകിയ അപ്പീൽ ഫയയിൽ സ്വീകരിച്ചാണ് നടപടി. ഒന്നും രണ്ടും മൂന്നും പ്രതികളായ അജേഷ്, നിഥിൻകുമാർ, അഖിലേഷ് എന്നിവർക്ക് ഹൈക്കോടതി ഇതു സംബന്ധിച്ച് നോട്ടീസ് അയച്ചു. നോട്ടീസ് ലഭിച്ച് 10 ദിവസത്തിനകം പ്രതികൾ കാസർകോട് സെഷൻസ് കോടതിയിൽ ഹാജരായി 50000 രൂപയും രണ്ട് ആൾ ജാമ്യവും ഓരോരുത്തരും ബോണ്ടും നൽകണം. ഹാജരാകാതിരുന്നാൽ ജാമ്യമില്ലാവാറന്റ് ഇറക്കാം. പാസ്പോർട്ടും ഹാജരാക്കണം.ജസ്റ്റിസ് ജയശങ്കരൻ നമ്പ്യാർ, ജസ്റ്റിസ് വി എം ശ്യാംകുമാർ എന്നിവർ ഉൾപ്പെട്ട ഡിവിഷൻ ബഞ്ചാണ് ഹർജി പരിഗണിച്ചത്.
