ജി സുധാകരൻ്റെ വിമർശനം: നവകേരളം പിണറായിയുടെ സൃഷ്ടിയല്ലെന്ന് പ്രഖ്യാപനം

പുന്നപ്ര

: കേരള രാഷ്ട്രീയത്തിൽ ചർച്ചകൾക്ക് തിരികൊളുത്തി മുൻ മന്ത്രിയും അമ്പലപ്പുഴയിലെ യുഡിഎഫ് സ്വതന്ത്ര സ്ഥാനാർത്ഥിയുമായ ജി. സുധാകരൻ രംഗത്ത്. നവകേരളം ഉണ്ടായത് പിണറായി വിജയൻ മുഖ്യമന്ത്രിയായ ശേഷമല്ലെന്നും 1956 നവംബർ ഒന്നിനാണ് യഥാർത്ഥ നവകേരളം പിറന്നതെന്നും അദ്ദേഹം പുന്നപ്രയിൽ നടന്ന തെരഞ്ഞെടുപ്പ് പ്രചരണ പരിപാടിയിൽ പ്രസ്താവിച്ചു.

നിലവിലെ മന്ത്രിസഭയിലെ അംഗങ്ങളെയും ഭരണശൈലിയെയും രൂക്ഷമായ ഭാഷയിലാണ് സുധാകരൻ വിമർശിച്ചത്. പഴയകാല കമ്മ്യൂണിസ്റ്റ് മന്ത്രിമാരുടെ ലാളിത്യം ഇന്നത്തെ മന്ത്രിമാർക്കില്ലെന്ന് അദ്ദേഹം കുറ്റപ്പെടുത്തി. ഭരണഘടനയെ അവഹേളിക്കുന്ന പ്രസ്താവന നടത്തിയ സജി ചെറിയാനെ അന്ന് തന്നെ പാർട്ടിയിൽ നിന്ന് പുറത്താക്കേണ്ടതായിരുന്നുവെന്നും, അദ്ദേഹത്തെ എന്തിനാണ് വീണ്ടും മന്ത്രിസഭയിൽ തിരിച്ചെടുത്തതെന്നും അദ്ദേഹം ചോദിച്ചു.

ചെങ്ങന്നൂർ മണ്ഡലത്തിൽ സിപിഐഎമ്മിന് നേരിട്ട തിരിച്ചടികൾക്ക് സജി ചെറിയാനാണ് ഉത്തരവാദിയെന്ന് സുധാകരൻ ആരോപിച്ചു. ഏഴോളം പഞ്ചായത്തുകൾ ഉണ്ടായിരുന്ന സിപിഐഎമ്മിന്റെ സ്വാധീനം രണ്ടായി ചുരുങ്ങിയെന്നും, ബിജെപി സ്ഥാനാർത്ഥിയായി ഗോപകുമാറിനെ നിർദ്ദേശിച്ചത് സജി ചെറിയാനാണെന്നും സുധാകരൻ കൂട്ടിച്ചേർത്തു. വരാനിരിക്കുന്ന തെരഞ്ഞെടുപ്പിൽ ഈ വിഷയങ്ങൾ സജീവ ചർച്ചയാകുമെന്ന് ഉറപ്പായിട്ടുണ്ട്.