വോട്ട് രേഖപ്പെടുത്താം സുരക്ഷിതമായി; അറിയേണ്ട നടപടിക്രമങ്ങൾ

തിരുവനന്തപുരം:

സംസ്ഥാനത്ത് വോട്ടെടുപ്പ് പുരോഗമിക്കാനിരിക്കെ, പോളിങ് ബൂത്തുകളിൽ വോട്ടർമാർ പാലിക്കേണ്ട നടപടിക്രമങ്ങൾ തെരഞ്ഞെടുപ്പ് കമ്മീഷൻ വിശദീകരിച്ചു. രാവിലെ ഏഴ് മണി മുതൽ വൈകിട്ട് ആറ് മണി വരെയാണ് വോട്ടിങ് സമയം. ആറ് മണിക്ക് ക്യൂവിലുള്ള അവസാന വോട്ടർക്കും ടോക്കൺ നൽകി വോട്ട് ചെയ്യാൻ അവസരം ഉറപ്പാക്കും.

ബൂത്തിലെ നടപടികൾ:

ബൂത്തിലെത്തുന്ന വോട്ടർ ആദ്യം ഒന്നാം പോളിങ് ഓഫീസറുടെ അടുത്തെത്തി തിരിച്ചറിയൽ രേഖകൾ പരിശോധിച്ച് ഉറപ്പുവരുത്തണം. തുടർന്ന് രണ്ടാം പോളിങ് ഓഫീസർ വോട്ടറുടെ ഇടതുകയ്യിലെ ചൂണ്ടുവിരലിൽ മഷി പുരട്ടുകയും വോട്ടേഴ്സ് രജിസ്റ്ററിൽ ഒപ്പ് രേഖപ്പെടുത്തുകയും ചെയ്യും. ഈ ഘട്ടത്തിന് ശേഷം ലഭിക്കുന്ന വോട്ടേഴ്സ് സ്ലിപ്പുമായി മൂന്നാം പോളിങ് ഓഫീസറെ സമീപിക്കണം. വിരലിലെ മഷി പരിശോധിച്ച ശേഷം ഓഫീസർ വോട്ടിങ് യന്ത്രം സജ്ജമാക്കും.

വോട്ട് ചെയ്യുമ്പോൾ:

വോട്ടിങ് കൗണ്ടറിൽ പ്രവേശിച്ച് ഇഷ്ടമുള്ള സ്ഥാനാർത്ഥിയുടെ പേരിന് നേരെയുള്ള നീല ബട്ടൺ അമർത്തണം. ഈ സമയം ബീപ് ശബ്ദം കേൾക്കുകയും വിവിപാറ്റ് (VVPAT) യന്ത്രത്തിലൂടെ വോട്ട് ആർക്കാണ് ലഭിച്ചതെന്ന് ഏഴ് സെക്കൻഡ് ദൃശ്യമാവുകയും ചെയ്യും. സ്ഥാനാർത്ഥികളിൽ ആരെയും താല്പര്യമില്ലെങ്കിൽ ‘നോട്ട’ (NOTA) ബട്ടൺ അമർത്താനുള്ള സൗകര്യവുമുണ്ട്.

മഷി പതിയാതിരിക്കാൻ വിരലിൽ എണ്ണയോ മറ്റോ പുരട്ടിയതായി ശ്രദ്ധയിൽപ്പെട്ടാൽ അത് തുടച്ചുനീക്കിയ ശേഷം മാത്രമേ മഷി പുരട്ടുകയുള്ളൂ. ഏതെങ്കിലും കാരണവശാൽ റീപോളിംഗ് നടക്കുകയാണെങ്കിൽ നടുവിരലിലാകും മഷി രേഖപ്പെടുത്തുക. എന്തെങ്കിലും സാങ്കേതിക തടസ്സങ്ങൾ അനുഭവപ്പെട്ടാൽ വോട്ടർമാർ ഉടൻ തന്നെ പ്രിസൈഡിങ് ഓഫീസറെ വിവരം അറിയിക്കേണ്ടതാണ്.