സൗജന്യ സിലിണ്ടർ, തൊഴിൽരഹിതർക്ക് 4000 രൂപ; വിപ്ലവകരമായ പ്രഖ്യാപനങ്ങളുമായി ടി.വി.കെ. പ്രകടനപത്രിക
BY sumeshkrishna
ചെന്നൈ: തമിഴ്നാട് രാഷ്ട്രീയത്തിൽ നിർണ്ണായക ചുവടുവെപ്പുമായി വിജയിയുടെ തമിഴക വെട്രി കഴകം (TVK) പ്രകടനപത്രിക പുറത്തിറക്കി. സാധാരണക്കാരെയും യുവാക്കളെയും ലക്ഷ്യമിട്ടുള്ള വമ്പൻ വാഗ്ദാനങ്ങളാണ് പത്രികയിലുടനീളമുള്ളത്. ലഹരിമുക്ത തമിഴ്നാട് എന്ന ലക്ഷ്യത്തോടെയാണ് പാർട്ടി മുന്നോട്ട് പോകുന്നതെന്ന് വിജയ് പ്രഖ്യാപിച്ചു.
പ്രധാന വാഗ്ദാനങ്ങൾ:
- സാമ്പത്തിക സഹായം: തൊഴിൽരഹിതരായ ബിരുദധാരികൾക്ക് പ്രതിമാസം 4000 രൂപ വീതം നൽകും. 60 വയസ്സിന് താഴെയുള്ള ഗൃഹനാഥന്മാർക്ക് മാസം 2500 രൂപ ലഭ്യമാക്കും.
- കുടുംബങ്ങൾക്ക് ആശ്വാസം: ഒരു കുടുംബത്തിന് വർഷം 6 സൗജന്യ പാചകവാതക സിലിണ്ടറുകൾ നൽകും. 25 ലക്ഷം രൂപയുടെ ആരോഗ്യ ഇൻഷുറൻസ് പദ്ധതിയും നടപ്പിലാക്കും.
- വിദ്യാഭ്യാസവും തൊഴിലും: 20 ലക്ഷം രൂപ വരെ പലിശരഹിത വിദ്യാഭ്യാസ വായ്പ നൽകും. അഞ്ച് ലക്ഷം യുവാക്കൾക്ക് പുതിയ തൊഴിലവസരങ്ങൾ ഉറപ്പാക്കും.
- കർഷകർക്കും വിവാഹങ്ങൾക്കും: അഞ്ചേക്കറിൽ താഴെ ഭൂമിയുള്ള കർഷകരുടെ വായ്പകൾ പൂർണ്ണമായും എഴുതിത്തള്ളും. വധുവിന് പട്ടുസാരിയും ഒരു പവൻ സ്വർണ്ണവും സമ്മാനമായി നൽകും.
ജനങ്ങളെ വഞ്ചിക്കില്ലെന്നും തമിഴ്നാടിന്റെ സമഗ്ര പുരോഗതിയാണ് ലക്ഷ്യമെന്നും പ്രകടനപത്രിക പുറത്തിറക്കിക്കൊണ്ട് വിജയ് വ്യക്തമാക്കി.
