ശ്രീഗുരുവായൂരപ്പന് ഭക്തിനിർഭരമായി കാഴ്ചക്കുല സമർപ്പിച്ച് ഭക്തജനങ്ങൾ; ദേവസ്വം മന്ത്രി കെ. മുരളീധരനും പങ്കെടുത്തു
BY : PRANOB GURUVAYUR
ഗുരുവായൂർ:
ഉത്രാട നാളിൽ ശ്രീഗുരുവായൂരപ്പന് ഭക്തിനിർഭരമായ ചടങ്ങുകളോടെ കാഴ്ചക്കുല സമർപ്പണം നടന്നു. ദേവസ്വം മന്ത്രി കെ. മുരളീധരൻ ഉൾപ്പെടെ നൂറുകണക്കിന് ഭക്തജനങ്ങളാണ് ക്ഷേത്രത്തിലെത്തി ഭഗവാന് നേന്ത്രക്കുലകൾ സമർപ്പിച്ചത്.
രാവിലത്തെ ശീവേലിക്കു ശേഷം ഏഴു മണിയോടെയാണ് കാഴ്ചക്കുല സമർപ്പണ ചടങ്ങുകൾ ആരംഭിച്ചത്. സ്വർണക്കൊടിമരത്തിന് സമീപം ഒരുക്കിയ നാക്കിലയിൽ ക്ഷേത്രം മേൽശാന്തി ബ്രഹ്മശ്രീ തെക്കുംപറമ്പത്ത് മനയിൽ നാരായണൻ നമ്പൂതിരി ആദ്യ കാഴ്ചക്കുല സമർപ്പിച്ചു. തുടർന്ന് ക്ഷേത്രം ഊരാളനും ദേവസ്വം ഭരണസമിതി അംഗവുമായ ബ്രഹ്മശ്രീ മല്ലിശ്ശേരി പരമേശ്വരൻ നമ്പൂതിരിപ്പാട്, ദേവസ്വം മന്ത്രി കെ. മുരളീധരൻ, ദേവസ്വം ചെയർമാൻ എ.വി. ഗോപിനാഥ് എന്നിവർ ഭഗവാന് കാഴ്ചക്കുലകൾ അർപ്പിച്ചു.
ദേവസ്വം ഭരണസമിതി അംഗങ്ങളായ സി. മനോജ്, മനോജ് ബി. നായർ, എം.യു. ഷിനിജ, തൃശൂർ ജില്ലാ കളക്ടർ ശിഖ സുരേന്ദ്രൻ ഐ.എ.എസ്, അഡ്മിനിസ്ട്രേറ്റർ ഹരി ഗോപാൽ എസ്., ക്ഷേത്രം ഡി.എ. എം. രാധാ, ഭരണ വിഭാഗം ഡി.എ. പ്രമോദ് കളരിക്കൽ തുടങ്ങിയ പ്രമുഖരും ചടങ്ങിൽ സംബന്ധിച്ച് കാഴ്ചക്കുലകൾ സമർപ്പിച്ചു. തുടർന്ന് കാത്തുനിന്ന ഭക്തജനങ്ങൾ ഒന്നൊന്നായി കാഴ്ചക്കുലകൾ സമർപ്പിച്ച് ദർശനസായൂജ്യം നേടി.
സമർപ്പിക്കപ്പെട്ട കാഴ്ചക്കുലകളിൽ ഒരു ഭാഗം നാളത്തെ തിരുവോണ സദ്യയ്ക്കുള്ള വിശേഷ വിഭവമായ പഴംപ്രഥമൻ തയ്യാറാക്കാൻ ഉപയോഗിക്കും. ക്ഷേത്രാവശ്യങ്ങൾക്ക് ശേഷമുള്ള കാഴ്ചക്കുലകൾ പിന്നീട് ഭക്തർക്ക് ലേലം ചെയ്തു നൽകുന്നതായിരിക്കും.
