മുന്നറിയിപ്പുമായി ഗവേഷകർ: ഈ ആന്റിബയോട്ടിക് ഉപയോഗിക്കുന്നതിൽ ജാഗ്രത വേണം; മുതിർന്നവരിൽ മരണസാധ്യത വർദ്ധിപ്പിക്കുന്നതായി പുതിയ പഠനം
പരക്കെ ഉപയോഗിച്ചുവരുന്ന ഒരു പ്രമുഖ ആന്റിബയോട്ടിക്കായ ‘സെഫെപീം’ (Cefepime) മറ്റ് ബീറ്റാ-ലാക്ടം (β-lactam) വിഭാഗത്തിൽപ്പെട്ട ആന്റിബയോട്ടിക്കുകളെ അപേക്ഷിച്ച് മുതിർന്നവരിൽ മരണസാധ്യത വർദ്ധിപ്പിക്കുന്നതായി പുതിയ അവലോകന പഠനം. എന്നാൽ കുട്ടികളിൽ ഇത് മരണസാധ്യത വർദ്ധിപ്പിക്കുന്നതായി തെളിവുകളില്ലെന്ന് പഠനം ചൂണ്ടിക്കാണിക്കുന്നു.
‘ജാമാ നെറ്റ്വർക്ക് ഓപ്പൺ’ (JAMA Network Open) എന്ന പ്രമുഖ മെഡിക്കൽ ജേണലിൽ പ്രസിദ്ധീകരിച്ച പഠനത്തിലാണ് ഈ കണ്ടെത്തൽ.
പ്രധാന കണ്ടെത്തലുകൾ:
- മരണനിരക്കിലെ വർദ്ധനവ്: സെഫെപീം കഴിച്ച 11,726 പേരിൽ 778 പേർ (6.6%) മരണപ്പെട്ടപ്പോൾ, മറ്റ് ബീറ്റാ-ലാക്ടം ആന്റിബയോട്ടിക്കുകൾ കഴിച്ചവരിൽ ഇത് 6.2% ആയിരുന്നു. അതായത് ഓരോ 1000 രോഗികളിലും 4 പേരുടെ അധിക മരണസാധ്യത സെഫെപീം ഉപയോഗത്തിൽ കാണപ്പെട്ടു.
- മുതിർന്നവരിൽ റിസ്ക് കൂടുതൽ: മുതിർന്ന രോഗികളിൽ സെഫെപീം ഉപയോഗം വഴി മരണസാധ്യത 18% വർദ്ധിക്കുന്നതായി കണ്ടെത്തി. എന്നാൽ കുട്ടികളിൽ ഇത് സുരക്ഷിതമായി പ്രവർത്തിക്കുന്നതായാണ് വിവരങ്ങൾ.
- വിവിധ രോഗങ്ങളിലെ നിരക്ക്: ന്യൂട്രോപീനിയ (Febrile neutropenia), കഠിനമായ ബാക്ടീരിയൽ അണുബാധകൾ എന്നിവയുള്ള രോഗികളിൽ മരണസാധ്യത 19% വരെയും, ന്യൂമോണിയ ഉള്ളവരിൽ 11%, മൂത്രശയ അണുബാധയുള്ളവരിൽ (UTI) 33% വരെയും വർദ്ധനവ് കാണിച്ചു.
ചികിത്സാരംഗത്തെ ജാഗ്രത:
ന്യൂമോണിയ, മൂത്രശയ അണുബാധ, മെനിഞ്ചൈറ്റിസ് തുടങ്ങി ജീവന് ഭീഷണിയാകുന്ന അണുബാധകൾക്ക് നൽകിവരുന്ന പ്രധാന ഔഷധമാണ് സെഫെപീം. പഠനമനുസരിച്ച്, സെഫെപീം ഇപ്പോഴും ഗുരുതര രോഗങ്ങൾക്ക് ഫലപ്രദമായ മരുന്നാണെങ്കിലും, ഇതിന്റെ പാർശ്വഫലങ്ങളും റിസ്കും കണക്കിലെടുത്ത് ഡോക്ടർമാർ കുറിച്ചുനൽകുമ്പോൾ കൂടുതൽ ജാഗ്രത പാലിക്കേണ്ടതുണ്ടെന്ന് വിദഗ്ദ്ധർ ഓർമ്മിപ്പിക്കുന്നു.
