ഇസ്രായേൽ-അമേരിക്കൻ സഖ്യത്തിന് കടുത്ത മുന്നറിയിപ്പുമായി ഇറാൻ: തിരിച്ചടി ആരും പ്രതീക്ഷിക്കാത്ത അത്യുഗ്ര ശക്തിയിലായിരിക്കുമെന്ന് വിദേശകാര്യ മന്ത്രി

ടെഹ്‌റാൻ: പശ്ചിമേഷ്യൻ മേഖലയിൽ യുദ്ധം കൊടുമ്പിരി കൊള്ളുന്നതിനിടെ ഇസ്രായേൽ-അമേരിക്കൻ സഖ്യത്തിനെതിരെ വീണ്ടും മുന്നറിയിപ്പുമായി ഇറാൻ. ഇറാനെതിരെ ഇനിയൊരു സൈനിക ആക്രമണമുണ്ടായാൽ അത് ആരും പ്രതീക്ഷിക്കാത്ത ശക്തമായ തിരിച്ചടിയാകും (‘earth-shattering blow’) എന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി വ്യക്തമാക്കി. അതേസമയം, യുദ്ധം മൂലം കടുത്ത ഇന്ധന പ്രതിസന്ധിയും 100 കോടിയിലധികം യൂറോയുടെ സാമ്പത്തിക ബാധ്യതയും നേരിടുകയാണെന്ന് ജർമ്മനി ആശങ്ക പ്രകടിപ്പിച്ചിട്ടുണ്ട്.

പേർഷ്യൻ ഉൾക്കടലിലെ പ്രധാന വ്യാപാരാതിർത്തിയായ ഹോർമുസ് കടലിടുക്കിൽ പ്രവേശിച്ച നാല് എണ്ണക്കപ്പലുകളിൽ വൻ തീപിടുത്തവും സ്ഫോടനവും ഉണ്ടായതായി ഇസ്ലാമിക് റെവല്യൂഷണറി ഗാർഡ് കോർപ്സ് (ഐആർജിസി) സ്ഥിരീകരിച്ചു. ഇറാൻ അനുവദിച്ച സുരക്ഷിത പാതകൾ ലംഘിച്ച് സഞ്ചരിച്ചതിനെ തുടർന്നാണ് അപകടമുണ്ടായതെന്നാണ് ഐആർജിസി വിശദീകരണം.

സൈനിക പോരാട്ടങ്ങൾക്കിടയിലും യുദ്ധം അവസാനിപ്പിക്കാനുള്ള സമാധാന നീക്കങ്ങളും പുരോഗമിക്കുന്നുണ്ട്. ഖത്തറിൽ നിന്നുള്ള ഉന്നതതല പ്രതിനിധി സംഘം ചർച്ചകൾക്കായി ടെഹ്‌റാനിൽ തിരിച്ചെത്തി. യുദ്ധം അവസാനിപ്പിക്കുന്നത് സംബന്ധിച്ച് അമേരിക്കയുടെ നിർണായക സന്ദേശമടങ്ങിയ കത്ത് തങ്ങൾക്ക് ലഭിച്ചതായി ഇറാനിലെ ഔദ്യോഗിക വൃത്തങ്ങൾ സ്ഥിരീകരിച്ചു.

അതേസമയം, സൗദി അറേബ്യയിലെ റിയാദ്, ഈസ്റ്റേൺ പ്രൊവിൻസ്, മദീന, മക്ക തുടങ്ങിയ തന്ത്രപ്രധാന മേഖലകളെ ലക്ഷ്യമിട്ടു വന്ന ശത്രു ഡ്രോണുകൾ തടഞ്ഞു തകർത്തതായി സൗദി സഖ്യസേന അറിയിച്ചു. എന്നാൽ സൗദിക്കു നേരെ അത്തരം യാതൊരുവിധ ആക്രമണങ്ങളും നടത്തിയിട്ടില്ലെന്ന് യെമനിലെ ഹൂതി വൃത്തങ്ങൾ വ്യക്തമാക്കി.