അത്ഭുതകരമായ തിരിച്ചുവരവ്: പാമ്പുകടിയേറ്റ അഞ്ചുവയസുകാരൻ ജീവിതത്തിലേക്ക്
കോഴിക്കോട്:
കുറ്റ്യാടിയിൽ ഉറക്കത്തിനിടെ പാമ്പുകടിയേറ്റ് അതീവ ഗുരുതരാവസ്ഥയിലായ അഞ്ചുവയസുകാരൻ ഡോക്ടർമാരുടെ സമയോചിതമായ ഇടപെടലിലൂടെ ജീവിതത്തിലേക്ക് തിരിച്ചെത്തി. കുണ്ടുതോട് ഗവൺമെൻ്റ് എൽപി സ്കൂളിലെ യുകെജി വിദ്യാർഥിയായ അൽവിനാണ് കോഴിക്കോട് മെഡിക്കൽ കോളജ് മാതൃശിശു സംരക്ഷണ കേന്ദ്രത്തിലെ വിദഗ്ധ ചികിത്സയ്ക്ക് ശേഷം സുഖം പ്രാപിച്ചത്.
അവധിക്കാലം ആഘോഷിക്കാൻ മാതൃവീട്ടിലെത്തിയ അൽവിനെ രാവിലെ എഴുന്നേൽക്കാൻ സാധിക്കാത്ത വിധം കടുത്ത ശാരീരിക അസ്വസ്ഥതകളോടെയാണ് കണ്ടെത്തിയത്. കൺപോളകൾ തൂങ്ങുകയും വായിൽ നിന്ന് നുരയും പതയും വരികയും ചെയ്തതോടെ വീട്ടുകാർ ഉടൻ തന്നെ കുട്ടിയെ ആശുപത്രിയിൽ എത്തിക്കുകയായിരുന്നു. ലക്ഷണങ്ങൾ കണ്ട് പാമ്പുകടിയാണെന്ന് തിരിച്ചറിഞ്ഞ ഡോക്ടർമാർ ഉടനടി ആൻ്റിവെനം നൽകുകയും വെൻ്റിലേറ്ററിലേക്ക് മാറ്റുകയും ചെയ്തു. രണ്ട് ദിവസത്തെ തീവ്രപരിചരണത്തിന് ഒടുവിലാണ് കുട്ടി അപകടനില തരണം ചെയ്തത്. കൃത്യസമയത്ത് ചികിത്സ ലഭ്യമാക്കിയതാണ് പിഞ്ചുകുഞ്ഞിൻ്റെ ജീവൻ രക്ഷിക്കാൻ തുണയായത്.
