ഇസ്രായേൽ സ്വാതന്ത്ര്യദിന ചടങ്ങിലേക്ക് ഇന്ത്യൻ പൈലറ്റിന് ക്ഷണം; ‘ലോകത്തിന്റെ നായകൻ’ എന്ന് നെതന്യാഹു

ദുബായ്: ഇസ്രായേൽ സ്വാതന്ത്ര്യദിനത്തിൽ നടക്കാനിരിക്കുന്ന ദീപം തെളിക്കൽ ചടങ്ങിലേക്ക് ഇന്ത്യൻ പൈലറ്റ് ക്യാപ്റ്റൻ സ്‌മിത് മച്ചാറിനെ കാബിനറ്റ് പ്രമേയത്തിലൂടെ ക്ഷണിച്ച് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. ‘ലോകത്തിന്റെ നായകൻ’ (Hero of the Entire World) എന്ന വിശേഷണത്തോടെയാണ് ബെഞ്ചമിൻ നെതന്യാഹു മച്ചാറിനെയും ഇന്ത്യൻ പ്രധാനമന്ത്രി നരേന്ദ്ര മോദിയെയും ഔദ്യോഗികമായി ചടങ്ങിലേക്ക് ക്ഷണിച്ചത്.

ദുബായിൽ നിന്ന് ടെൽ അവീവിലേക്ക് പോകുകയായിരുന്ന ഫ്ലൈ ദുബായ് (flydubai) വിമാനം തകർക്കാൻ സഹപൈലറ്റ് നടത്തിയ ശ്രമത്തെ സ്വന്തം ജീവൻ പണയം വെച്ച് പരാജയപ്പെടുത്തിയതിനാണ് മച്ചാറിന് അന്താരാഷ്ട്ര തലത്തിൽ അഭിനന്ദനങ്ങൾ പ്രവഹിക്കുന്നത്. കോക്ക്പിറ്റിൽ വെച്ച് സഹപൈലറ്റിന്റെ ആക്രമണത്തിൽ ഗുരുതരമായി പരിക്കേറ്റിട്ടും സമചിത്തതയോടെ കോക്ക്പിറ്റിന്റെ വാതിൽ തുറന്ന് നൽകാൻ മച്ചാറിന് സാധിച്ചു. തുടർന്ന് യാത്രക്കാരും ക്രൂ അംഗങ്ങളും ചേർന്ന് അക്രമിയെ കീഴ്പ്പെടുത്തുകയായിരുന്നു.

174-ഓളം യാത്രക്കാരുടെ ജീവൻ രക്ഷിച്ച ഈ ധീരതയ്ക്കാണ് ഇസ്രായേലിന്റെ പരമോന്നത ആദരവുകളിലൊന്നായ സ്വാതന്ത്ര്യദിന ചടങ്ങിലേക്ക് അദ്ദേഹത്തെ ക്ഷണിച്ചിരിക്കുന്നത്. നിലവിൽ യുഎഇയിലെ ആശുപത്രിയിൽ ചികിത്സയിൽ കഴിയുന്ന മച്ചാറുമായി നെതന്യാഹു നേരിട്ട് ഫോണിൽ സംസാരിച്ച് വേഗത്തിൽ സുഖം പ്രാപിക്കട്ടെ എന്ന് ആശംസിച്ചു.