പഹൽഗാം ഭീകരാക്രമണം: ഭീകരർ ഉപയോഗിച്ച ഫോണുകൾ ചൈനയിൽ നിന്ന് പാകിസ്ഥാനിലെത്തിച്ചു; ഹമാസ് ബന്ധത്തിലും എൻ.ഐ.എ അന്വേഷണം
ന്യൂഡൽഹി:
പഹൽഗാം ഭീകരാക്രമണത്തിൽ ഭീകരർ ഉപയോഗിച്ച അത്യാധുനിക ഫോണുകൾ ചൈനയിൽ നിന്ന് പാകിസ്ഥാനിലേക്ക് കടത്തിയതാണെന്ന് ദേശീയ അന്വേഷണ ഏജൻസി (NIA) കണ്ടെത്തി. 2021-ൽ കറാച്ചി ആസ്ഥാനമായുള്ള കമ്പനിയാണ് ഈ ഫോണുകൾ പാകിസ്ഥാനിലേക്ക് ഇറക്കുമതി ചെയ്തതെന്ന് എൻ.ഐ.എ സമർപ്പിച്ച കുറ്റപത്രത്തിൽ വ്യക്തമാക്കുന്നു. വർഷങ്ങളോളം ഒളിപ്പിച്ചു വെച്ച ഈ ഫോണുകൾ ഭീകരവാദ പ്രവർത്തനങ്ങൾക്ക് വേണ്ടി മാത്രമാണ് പുറത്തെടുത്തത്. ഡിജിറ്റൽ തെളിവുകൾ അവശേഷിപ്പിക്കാതിരിക്കാൻ മൊബൈൽ നെറ്റ്വർക്കുകൾക്ക് പകരം ലോംഗ് റേഞ്ച് റേഡിയോ സംവിധാനങ്ങളാണ് ഇവർ ആശയവിനിമയത്തിനായി ഉപയോഗിച്ചതെന്നും അന്വേഷണത്തിൽ തെളിഞ്ഞു.
ഫോണുകളിൽ കോൾ റെക്കോർഡുകളോ സന്ദേശങ്ങളോ ഉണ്ടായിരുന്നില്ലെങ്കിലും, ആക്രമണം മുൻകൂട്ടി ആസൂത്രണം ചെയ്തതാണെന്ന് തെളിയിക്കുന്ന ഡിജിറ്റൽ വിവരങ്ങൾ ഫോറൻസിക് പരിശോധനയിൽ ലഭിച്ചു. ആക്രമണം നടന്ന ബൈസരൺ താഴ്വരയുടെ ലൊക്കേഷൻ ഭീകരർ ഉപയോഗിച്ച നാവിഗേഷൻ ആപ്പിൽ സേവ് ചെയ്തിട്ടുണ്ടായിരുന്നു. ഏപ്രിൽ 22-ന് നടന്ന ആക്രമണത്തിന് ഒരാഴ്ച മുമ്പ് എടുത്ത താഴ്വരയുടെ ഫോട്ടോകളും ഫോണിൽ നിന്ന് കണ്ടെടുത്തു.
ഹമാസ് ബന്ധത്തിലും അന്വേഷണം
ആക്രമണം നടത്തിയ ടി.ആർ.എഫിന് (TRF) അന്താരാഷ്ട്ര ഭീകര സംഘടനകളായ ഹമാസുമായും അൽഖ്വയ്ദയുമായും ബന്ധമുണ്ടെന്ന് എൻ.ഐ.എ സംശയിക്കുന്നു. 2023 ഒക്ടോബർ ഏഴിന് ഹമാസ് ഇസ്രയേലിൽ നടത്തിയ ക്രൂരമായ ആക്രമണത്തിന് സമാനമായ ശൈലിയാണ് പഹൽഗാമിലും സ്വീകരിച്ചതെന്ന് കുറ്റപത്രത്തിൽ പറയുന്നു. പാകിസ്ഥാൻ ആസ്ഥാനമായുള്ള ഭീകര ഗ്രൂപ്പുകളും ഹമാസും തമ്മിലുള്ള ബന്ധം എൻ.ഐ.എ സൂക്ഷ്മമായി പരിശോധിച്ചുവരികയാണ്. പഹൽഗാം ആക്രമണത്തിനു ശേഷം ഹമാസും കശ്മീരിലെ ഭീകരസംഘടനങ്ങളും തമ്മിലുള്ള ആശയവിനിമയം വർദ്ധിച്ചതായും കണ്ടെത്തിയിട്ടുണ്ട്.
ഓപ്പറേഷൻ മഹാദേവ്
- ആകെ മരണം: 25 വിനോദസഞ്ചാരികളും ഒരു പ്രദേശവാസിയുമടക്കം 26 പേർക്കാണ് ആക്രമണത്തിൽ ജീവൻ നഷ്ടമായത്.
- ഭീകരരെ വധിച്ചു: ആക്രമണം നടത്തിയ പാക് സ്വദേശികളായ ഫൈസൽ ജാട്ട്, ഹബീബ് താഹിർ, ഹംസ അഫ്ഗാനി എന്നിവരെ കഴിഞ്ഞ വർഷം ജൂലൈയിൽ സുരക്ഷാസേന വധിച്ചിരുന്നു.
- സൈനിക നീക്കം: ‘ഓപ്പറേഷൻ മഹാദേവ്’ എന്ന് പേരിട്ട അതിശക്തമായ സംയുക്ത സൈനിക നീക്കത്തിലൂടെയാണ് ഈ മൂന്ന് പാക് ഭീകരരെയും സുരക്ഷാസേന വധിച്ചത്.
