മിഡിൽ ഈസ്റ്റ് വീണ്ടും യുദ്ധഭീതിയിൽ; ‘കൊടുങ്കാറ്റിന് മുമ്പുള്ള ശാന്തത’യെന്ന മുന്നറിയിപ്പുമായി ട്രംപിന്റെ എ.ഐ ചിത്രം
വാഷിംഗ്ടൺ:
മിഡിൽ ഈസ്റ്റിൽ താൽക്കാലികമായി നിലനിന്നിരുന്ന വെടിനിർത്തൽ കരാർ ലംഘിക്കപ്പെടുമെന്ന സൂചന നൽകി യു.എസ് പ്രസിഡന്റ് ഡൊണാൾഡ് ട്രംപിന്റെ പുതിയ സോഷ്യൽ മീഡിയ പോസ്റ്റ്. യു.എസും ഇറാനും തമ്മിലുള്ള സമാധാന ചർച്ചകൾ പരാജയത്തിലേക്ക് നീങ്ങുന്നു എന്ന റിപ്പോർട്ടുകൾക്കിടയിലാണ്, വീണ്ടുമൊരു വൻ യുദ്ധസാധ്യതയ്ക്ക് ആക്കം കൂട്ടിക്കൊണ്ട് ട്രംപ് ട്രൂത്ത് സോഷ്യൽ പ്ലാറ്റ്ഫോമിൽ വിവാദ ചിത്രം പങ്കുവെച്ചത്.
ചുവന്ന “മേക്ക് അമേരിക്ക ഗ്രേറ്റ് എഗെയ്ൻ” (MAGA) തൊപ്പി ധരിച്ച്, ഒരു യു.എസ് നാവികസേനാ ഉദ്യോഗസ്ഥനോടൊപ്പം യുദ്ധക്കപ്പലിന്റെ ഡെക്കിൽ നിൽക്കുന്ന സ്വന്തം എ.ഐ (ആർട്ടിഫിഷ്യൽ ഇന്റലിജൻസ്) ചിത്രമാണ് ട്രംപ് പോസ്റ്റ് ചെയ്തത്. മിന്നൽപ്പിണരുകളുള്ള കാർമേഘങ്ങളും പ്രക്ഷുബ്ധമായ കടലും പശ്ചാത്തലത്തിലുള്ള ചിത്രത്തിൽ ഇറാനിയൻ പതാകയേന്തിയ കപ്പലുകളും ദൃശ്യമാണ്. “ഇത് കൊടുങ്കാറ്റിന് മുമ്പുള്ള ശാന്തതയായിരുന്നു” (It was the calm before the storm) എന്ന അടിക്കുറിപ്പോടെയാണ് ട്രംപ് ഈ ചിത്രം പങ്കുവെച്ചിരിക്കുന്നത്.
ചർച്ചകൾ അനിശ്ചിതത്വത്തിൽ; യുദ്ധപ്രതീക്ഷയോടെ പെന്റഗൺ
ഇറാൻ മുന്നോട്ടുവെച്ച നിർണായക വ്യവസ്ഥകൾ യു.എസ് തള്ളിയതാണ് നിലവിലെ പ്രതിസന്ധിക്ക് കാരണം. ഹോർമുസ് കടലിടുക്കിന്റെ നിയന്ത്രണവും ഇറാന്റെ ആണവ പദ്ധതികളും സംബന്ധിച്ച് പാകിസ്താന്റെ മധ്യസ്ഥതയിൽ നടന്ന ചർച്ചകൾ ലക്ഷ്യം കാണാതെ പിരിയുകയായിരുന്നു. ഇറാൻ നൽകിയ പുതിയ നിർദ്ദേശങ്ങൾ താൻ പൂർണ്ണമായി നിരസിച്ചതായി ചൈന സന്ദർശനത്തിന് ശേഷം മടങ്ങവെ എയർഫോഴ്സ് വണ്ണിൽ വെച്ച് ട്രംപ് മാധ്യമങ്ങളോട് വ്യക്തമാക്കിയിരുന്നു.
ഡിപ്ലോമാറ്റിക് ചർച്ചകൾ പരാജയപ്പെട്ടാൽ ഇറാനെതിരെ ശക്തമായ സൈനിക നടപടിക്ക് യു.എസ് മുതിരുമെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. മുൻപ് താൽക്കാലികമായി നിർത്തിവെച്ചിരുന്ന “ഓപ്പറേഷൻ എപിക് ഫ്യൂറി” (Operation Epic Fury) പുനരാരംഭിക്കാൻ പെന്റഗൺ ഇതിനകം തന്നെ പദ്ധതികൾ തയ്യാറാക്കിയിട്ടുണ്ട്. ചർച്ചകൾ പരാജയപ്പെട്ടാൽ ആക്രമണം ശക്തമാക്കാൻ തങ്ങൾ സജ്ജമാണെന്ന് യു.എസ് പ്രതിരോധ സെക്രട്ടറി പീറ്റ് ഹെഗ്സെത്തും വ്യക്തമാക്കി.
ഹോർമുസ് കടലിടുക്കിലൂടെയുള്ള ആഗോള എണ്ണ വിതരണത്തെ ബാധിക്കുന്ന തരത്തിൽ ഇറാൻ ഉപരോധം ശക്തമാക്കിയ പശ്ചാത്തലത്തിലാണ് മേഖലയിൽ യു.എസ് നാവികസേന സന്നാഹം വർദ്ധിപ്പിച്ചിരിക്കുന്നത്. ട്രംപിന്റെ പുതിയ പോസ്റ്റ് മിഡിൽ ഈസ്റ്റിലെ സമാധാന പ്രതീക്ഷകൾക്ക് കനത്ത തിരിച്ചടിയാകുമെന്നാണ് വിലയിരുത്തപ്പെടുന്നത്.
