അനധികൃത സ്വത്ത് സമ്പാദന കേസ്: മുൻ ഡിജിപി ടോമിൻ ജെ. തച്ചങ്കരി കുറ്റക്കാരനെന്ന് കോടതി; തിരിച്ചടിയായത് 13 വർഷത്തെ നിയമപോരാട്ടം

By;TNN WEB TEAM

കോട്ടയം:

മുൻ സംസ്ഥാന പോലീസ് ഉപമേധാവിയും ഡിജിപിയുമായ ടോമിൻ ജെ. തച്ചങ്കരി അനധികൃത സ്വത്ത് സമ്പാദന കേസിൽ കുറ്റക്കാരനാണെന്ന് കോട്ടയം വിജിലൻസ് കോടതി വിധിച്ചു. അഴിമതി നിരോധന നിയമത്തിലെ വിവിധ വകുപ്പുകൾ പ്രകാരമാണ് കോട്ടയം വിജിലൻസ് കോടതി ജഡ്ജി കെ.വി. രജനീഷ് അദ്ദേഹത്തെ കുറ്റക്കാരനായി കണ്ടെത്തിയത്.

2003 ജനുവരി മുതൽ 2007 ജൂലായ് വരെയുള്ള ഔദ്യോഗിക സേവന കാലയളവിൽ തച്ചങ്കരി 64.70 ലക്ഷം രൂപയുടെ അനധികൃത സ്വത്ത് സമ്പാദിച്ചുവെന്നതാണ് വിജിലൻസ് കേസ്. ഔദ്യോഗിക പദവി ദുരുപയോഗം ചെയ്ത് അറിയപ്പെടുന്ന വരുമാന സ്രോതസ്സുകളേക്കാൾ 138 ശതമാനം അധികം സ്വത്ത് സമ്പാദിച്ചുവെന്നാണ് വിജിലൻസ് കണ്ടെത്തിയത്. കൂടാതെ, ഭൂമി ഇടപാടുകളിൽ സ്റ്റാംപ് ഡ്യൂട്ടി വെട്ടിച്ച് സർക്കാരിന് വലിയ സാമ്പത്തിക നഷ്ടം വരുത്തിയെന്നും വിജിലൻസ് സമർപ്പിച്ച റിപ്പോർട്ടിലുണ്ട്.

മൂന്ന് കോടതികളിലൂടെ 13 വർഷം നീണ്ട വിചാരണ

• 2007: ഐജി ആയിരിക്കെ വിജിലൻസ് കേസ് രജിസ്റ്റർ ചെയ്യുകയും വീടുകളിലും ഓഫീസുകളിലും മിന്നൽ പരിശോധന നടത്തുകയും ചെയ്തു.
• 2013: അന്വേഷണം പൂർത്തിയാക്കി തൃശൂർ വിജിലൻസ് കോടതിയിൽ വിജിലൻസ് കുറ്റപത്രം സമർപ്പിച്ചു.
• കേസ് മാറ്റം: തൃശൂരിൽ നിന്ന് കേസ് പിന്നീട് മൂവാറ്റുപുഴയിലേക്കും, അവിടെനിന്ന് കോട്ടയം വിജിലൻസ് കോടതിയിലേക്കും മാറ്റുകയായിരുന്നു.
• സാക്ഷിവിസ്താരം: വിചാരണ വേളയിൽ മുൻ ആഭ്യന്തരവകുപ്പ് ജോയിന്റ് സെക്രട്ടറി ഉൾപ്പെടെ 128 പ്രോസിക്യൂഷൻ സാക്ഷികളെ കോടതി വിസ്തരിച്ചു.

പാരമ്പര്യമായി കൈമാറിക്കിട്ടിയ കുടുംബ സ്വത്താണിതെന്ന തച്ചങ്കരിയുടെ വാദങ്ങൾ തള്ളിയാണ് കോടതി ഉത്തരവ്. എന്നാൽ, അടുത്തിടെ ഹൃദയശസ്ത്രക്രിയ കഴിഞ്ഞതാണെന്നും കടുത്ത ആരോഗ്യപ്രശ്നങ്ങളുണ്ടെന്നും ചൂണ്ടിക്കാട്ടി ശിക്ഷയിൽ ഇളവ് നൽകണമെന്ന് അദ്ദേഹം കോടതിയോട് അഭ്യർഥിച്ചിട്ടുണ്ട്.