വി. എം. കുട്ടി അനുസ്മരണ സമ്മേളനം തിരുവനന്തപുരത്ത് സംഘടിപ്പിച്ചു

തിരുവനന്തപുരം: മാപ്പിളപ്പാട്ടിനെ ജനകീയമാക്കുന്നതിൽ നിർണായക പങ്ക് വഹിച്ച പ്രതിഭയായിരുന്നു വി. എം. കുട്ടിയെന്ന് നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ അഭിപ്രായപ്പെട്ടു. വി. എം. കുട്ടി ഫൗണ്ടേഷന്റെയും മുഹമ്മദ് റാഫി ഗ്ലോബൽ ഫൗണ്ടേഷന്റെയും ആഭിമുഖ്യത്തിൽ സംഘടിപ്പിച്ച അഞ്ചാമത് വി. എം. കുട്ടി ചരമവാർഷിക അനുസ്മരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

സാംസ്കാരിക ചരിത്ര ഗവേഷണ രംഗത്തെ സംഭാവനകൾ മുൻനിർത്തി ഏർപ്പെടുത്തിയ ഈ വർഷത്തെ വി. എം. കുട്ടി സ്മാരക പുരസ്കാരം മലപ്പുറം ഗവൺമെന്റ് കോളേജ് അസിസ്റ്റന്റ് പ്രൊഫസറും ചരിത്ര ഗവേഷകനുമായ ഡോ. പി. സക്കീർ ഹുസൈന് സ്പീക്കർ സമ്മാനിച്ചു. ചടങ്ങിൽ ഗതാഗത വകുപ്പ് മന്ത്രി സി. പി. ജോൺ പ്രശസ്തിപത്രം സമർപ്പിക്കുകയും അനുസ്മരണ ഗാനസന്ധ്യ ഉദ്ഘാടനം ചെയ്യുകയും ചെയ്തു.

മുൻ എം.പി. പന്ന്യൻ രവീന്ദ്രൻ മുഖ്യപ്രഭാഷണം നിർവഹിച്ചു. ആർ. ജെ. ഡി. ദേശീയ ജനറൽ സെക്രട്ടറിയും കെ. ഡി. ഒ. ചെയർമാനുമായ നൗഷാദ് തോട്ടിൻകര ചടങ്ങിൽ അധ്യക്ഷത വഹിച്ചു. മികച്ച സാമൂഹ്യപ്രവർത്തകനുള്ള വി. എം. കുട്ടി സ്മാരക പുരസ്കാരം പന്ന്യൻ രവീന്ദ്രനിൽ നിന്നും നൗഷാദ് തോട്ടിൻകര ഏറ്റുവാങ്ങി. സംസ്ഥാന പ്രസിഡന്റ് മുജീബ് റഹ്മാൻ ആമുഖപ്രസംഗം നടത്തിയ ചടങ്ങിൽ ഡോ. ഗീതാ ഷാനവാസ് സ്വാഗതവും എം. എച്ച്. സുലൈമാൻ കൃതജ്ഞതയും അറിയിച്ചു. സബീർ തിരുമല, കെ. സി. ലേഖ, വള്ളക്കടവ് നിസാം തുടങ്ങി സമൂഹത്തിന്റെ വിവിധ മേഖലകളിലെ പ്രമുഖർ ചടങ്ങിൽ സംബന്ധിച്ചു. തുടർന്ന് വി. എം. കുട്ടിയുടെയും മറ്റും പ്രശസ്തമായ മാപ്പിള ഗാനങ്ങൾ ഉൾപ്പെടുത്തിയ ഗാനസന്ധ്യയും അരങ്ങേറി.