രാജ്യത്ത് കാലവർഷം കനക്കുന്നു; ഡൽഹിയിലും മൺസൂൺ എത്തി, കേരളമടക്കമുള്ള പശ്ചിമഘട്ട മേഖലകളിൽ അതീവ ജാഗ്രത
ന്യൂഡൽഹി ∙
രാജ്യത്ത് തെക്ക്-പടിഞ്ഞാറൻ മൺസൂൺ (കാലവർഷം) കൂടുതൽ ശക്തിപ്രാപിച്ചതായി ഇന്ത്യൻ കാലാവസ്ഥാ വകുപ്പ് (ഐഎംഡി) അറിയിച്ചു. ഡൽഹി ഉൾപ്പെടെ രാജ്യത്തിന്റെ ഭൂരിഭാഗം പ്രദേശങ്ങളിലും ഇതിനോടകം മൺസൂൺ എത്തിക്കഴിഞ്ഞു. ഇനി രാജസ്ഥാന്റെ പടിഞ്ഞാറൻ മേഖലകളിൽ മാത്രമാണ് മഴയെത്താനുള്ളത്. ബംഗാൾ ഉൾക്കടലിൽ രൂപംകൊണ്ട ന്യൂനമർദവും സജീവമായ മൺസൂൺ പാത്തിയുമാണ് നിലവിൽ മഴ ശക്തമാകാൻ കാരണം. കേരളം ഉൾപ്പെടുന്ന പശ്ചിമഘട്ട മേഖലകളിൽ വരും ദിവസങ്ങളിൽ അതിശക്തമായ മഴയ്ക്ക് സാധ്യതയുള്ളതിനാൽ വെള്ളപ്പൊക്കത്തിനും ഉരുൾപൊട്ടലിനും സാധ്യതയുണ്ടെന്നും കാലാവസ്ഥാ വകുപ്പ് മുന്നറിയിപ്പ് നൽകുന്നു.
പെയ്യാതെ പോകുന്ന മഴ; ചൂടും അസഹനീയമായ ഈർപ്പവും തുടരുന്നതെന്തുകൊണ്ട്?
പല സംസ്ഥാനങ്ങളിലും പരക്കെ മഴ ലഭിച്ചിട്ടും അന്തരീക്ഷത്തിൽ കടുത്ത ചൂടും ഉയർന്ന ഈർപ്പവും (ഹ്യുമിഡിറ്റി) തുടരുന്നത് ജനങ്ങളെ വലയ്ക്കുന്നുണ്ട്. ഇതിനു പിന്നിലെ ശാസ്ത്രീയ കാരണങ്ങൾ പരിസ്ഥിതി പ്രവർത്തകൻ ഹിഷ്മി ഹുസൈൻ വ്യക്തമാക്കുന്നു:
- വായുവിലെ ഉയർന്ന ജലാംശം: അറബിക്കടലിൽ നിന്നും ബംഗാൾ ഉൾക്കടലിൽ നിന്നും എത്തുന്ന മൺസൂൺ കാറ്റ് വലിയ അളവിൽ ജലാംശം വഹിക്കുന്നതിനാലാണ് അന്തരീക്ഷത്തിൽ ഈർപ്പം വൻതോതിൽ വർദ്ധിക്കുന്നത്.
- ഭൂമി ചൂടാകൽ: ചെറിയ മഴയ്ക്ക് പിന്നാലെ പെട്ടെന്ന് സൂര്യപ്രകാശം ശക്തമാകുമ്പോൾ നനഞ്ഞ ഭൂമി വേഗത്തിൽ ചൂടാകുകയും ജലബാഷ്പം അന്തരീക്ഷത്തിലേക്ക് ഉയരുകയും ചെയ്യുന്നു. ഇത് അസഹനീയമായ വിയർപ്പിനും ചൂടിനും കാരണമാകുന്നു.
- രാത്രിയിലെ മേഘാവൃതമായ അന്തരീക്ഷം: രാത്രികാലങ്ങളിൽ ആകാശം മേഘാവൃതമായിരിക്കുന്നത് ഭൂമിയിലെ ചൂട് പുറത്തേക്ക് പോകുന്നതിനെ തടയുന്നു (ഗ്രീൻഹൗസ് പ്രഭാവം). ഇതാണ് രാത്രിയിലും താപനില കുറയാത്തതിന് കാരണം.
വടക്കേ ഇന്ത്യയിൽ ഡൽഹി, ഉത്തരാഖണ്ഡ്, പഞ്ചാബ്, ഹിമാചൽപ്രദേശ്, ഉത്തർപ്രദേശ് എന്നിവിടങ്ങളിൽ ജൂലൈ 8 വരെ വ്യാപക മഴയ്ക്കും ശക്തമായ ഇടിമിന്നലിനും സാധ്യതയുണ്ട്. മണിക്കൂറിൽ 40 മുതൽ 60 കിലോമീറ്റർ വരെ വേഗത്തിൽ കാറ്റുവീശിയേക്കാം.
വിവിധ സംസ്ഥാനങ്ങൾക്ക് ജാഗ്രതാ നിർദേശം
വരാനിരിക്കുന്ന കടുത്ത കാലാവസ്ഥാ വ്യതിയാനം കണക്കിലെടുത്ത് വിവിധ സംസ്ഥാനങ്ങൾക്ക് കേന്ദ്ര കാലാവസ്ഥാ വകുപ്പ് കടുത്ത ജാഗ്രതാ നിർദേശം നൽകിയിട്ടുണ്ട്. ഉരുൾപൊട്ടൽ സാധ്യത മുൻനിർത്തി ഉത്തരാഖണ്ഡിൽ നിലവിൽ ഓറഞ്ച് അലർട്ട് പ്രഖ്യാപിച്ചു കഴിഞ്ഞു. ഇതിനു പുറമെ മധ്യപ്രദേശ്, ഛത്തീസ്ഗഢ്, മഹാരാഷ്ട്രയിലെ വിദർഭ മേഖലകൾ എന്നിവിടങ്ങളിലും അടുത്ത ദിവസങ്ങളിൽ അതിശക്തമായ മഴ ലഭിച്ചേക്കുമെന്നാണ് പ്രവചനം.
