പാലായിൽ കാർ വീട്ടുമുറ്റത്തേക്ക് മറിഞ്ഞു; താനൂരിൽ തെങ്ങ് വീണ് തൊഴിലാളി മരിച്ചു

പാലായിലും താനൂരിലും ഞായറാഴ്ച വ്യത്യസ്ത അപകടങ്ങൾ റിപ്പോർട്ട് ചെയ്തു. പാലായിൽ കാർ വീട്ടുമുറ്റത്തേക്ക് ഇടിച്ചുകയറി വലിയ അപകടം ഒഴിവായപ്പോൾ, താനൂരിൽ തെങ്ങ് മുറിക്കുന്നതിനിടെ അപകടത്തിൽപ്പെട്ട് തൊഴിലാളി ദാരുണമായി മരിച്ചു

പാലാ – തൊടുപുഴ റോഡിൽ ഐങ്കൊമ്പിന് സമീപം ഞായറാഴ്ച വൈകിട്ട് 5 മണിയോടെയായിരുന്നു ആദ്യ അപകടം. മുതലക്കോടം സ്വദേശികൾ സഞ്ചരിച്ചിരുന്ന കാർ നിയന്ത്രണം വിട്ട് വീടിന്റെ ചുറ്റുമതിലിടിച്ച് തകർത്ത് വീട്ടുമുറ്റത്തേക്ക് മറിയുകയായിരുന്നു. വാഹനം ഓടിച്ചിരുന്നയാൾ ഉറങ്ങിപ്പോയതാണ് അപകടത്തിന് കാരണമായത്. കാറിലുണ്ടായിരുന്നവർ നിസാര പരിക്കുകളോടെ അത്ഭുതകരമായി രക്ഷപെട്ടു. അപകടത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.

മറ്റൊരു സംഭവത്തിൽ, താനൂരിൽ തെങ്ങ് മുറിക്കുന്നതിനിടെ തലയിലേക്ക് തെങ്ങിൻ കഷ്ണം വീണ് തൊഴിലാളി മരിച്ചു. കുണ്ടുങ്ങൽ താമരക്കുളം ശിവക്ഷേത്രത്തിന് സമീപം താമസിക്കുന്ന കോൽക്കണ്ടത്തിൽ സുബ്രഹ്മണ്യൻ (മണി – 58) ആണ് മരിച്ചത്. ഞായറാഴ്ച ജോലി ചെയ്യുന്നതിനിടെ അപ്രതീക്ഷിതമായി തലയിലേക്ക് തെങ്ങിൻ കഷ്ണം പതിക്കുകയായിരുന്നു. ഗുരുതരമായി പരിക്കേറ്റ സുബ്രഹ്മണ്യനെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഷീലയാണ് ഭാര്യ. മക്കൾ: ഷിബിൻ, സുബിഷ. മരുമകൻ: ജിജീഷ്. സംസ്കാര ചടങ്ങുകൾ തിങ്കളാഴ്ച ഉച്ചയ്ക്ക് രണ്ടിന് ഒട്ടുംപുറം ശ്മശാനത്തിൽ നടന്നു.