പിഎസ്സി നിയമന ക്രമക്കേട്: ചെയർമാൻ എം.ആർ. ബൈജുവിനെയും അംഗങ്ങളെയും പ്രതി ചേർത്ത് എഫ്ഐആർ

തിരുവനന്തപുരം: ഫിഷറീസ് എക്സ്റ്റൻഷൻ ഓഫീസർ പരീക്ഷാ ക്രമക്കേട് കേസിൽ പിഎസ്സി ചെയർമാൻ എം.ആർ. ബൈജുവിനെയും ബോർഡ് അംഗങ്ങളെയും പ്രതി ചേർത്തു. സ്വജനപക്ഷപാതം കാണിച്ച് ഇഷ്ടക്കാർക്ക് നിയമനം നൽകുകയും അന്യായ ലാഭം ഉണ്ടാക്കുകയും ചെയ്തെന്ന കണ്ടെത്തലിന്റെ അടിസ്ഥാനത്തിലാണ് അന്വേഷണ സംഘത്തിന്റെ ഈ നടപടി.

അധികാര ദുർവിനിയോഗം നടത്തി യോഗ്യതയില്ലാത്തവർക്ക് നിയമനം നൽകിയതിലൂടെ ഭരണഘടനാ സ്ഥാപനമായ പിഎസ്സിയുടെ വിശ്വാസ്യതയ്ക്ക് കടുത്ത കോട്ടം വരുത്തിയെന്നും വിജിലൻസ് തയ്യാറാക്കിയ എഫ്ഐആറിൽ വ്യക്തമാക്കുന്നു. കഴിഞ്ഞ ദിവസങ്ങളിൽ പ്രത്യേക അന്വേഷണ സംഘം (SIT) ചോദ്യം ചെയ്തപ്പോൾ ചെയർമാനും അംഗങ്ങളും നൽകിയ മൊഴികളിൽ വലിയ വൈരുദ്ധ്യങ്ങൾ പ്രകടമായിരുന്നു.

ചോദ്യപ്പേപ്പർ നിർമ്മാണം, അഭിമുഖ പാനൽ തയാറാക്കൽ, അഭിമുഖത്തിന്റെ മാർക്ക് 40-ൽ നിന്ന് 25 ആക്കി കുറയ്ക്കൽ തുടങ്ങിയ കാര്യങ്ങൾ ചെയർമാന്റെ അധികാരപരിധിയിൽ വരുന്നവയാണെന്നും സാങ്കേതിക പിഴവുകൾ മാത്രമാണ് സംഭവിച്ചതെന്നുമാണ് എം.ആർ. ബൈജു നിലപാടെടുത്തത്. എന്നാൽ മൊഴികളിലെ വൈരുദ്ധ്യം കണക്കിലെടുത്ത് ഇവരെ ഉടൻ തന്നെ വീണ്ടും ചോദ്യം ചെയ്തേക്കും.