ജ്യോതിഷ-ശാസ്ത്ര ലോകത്തിന് നികത്താനാവാത്ത നഷ്ടം; ഡോ. കെ. ബാലകൃഷ്ണ വാര്യരുടെ നിര്യാണത്തിൽ അനുശോചനം
BY: KK GOPALAKRISHNAN [Former member of Akhila Kerala Jyothishasthra Mandalam ]
സംസ്കാരം ഇന്ന് വൈകിട്ട് മൂന്നിന് ഹരിപ്പാട് നങ്ങ്യാർകുളങ്ങരയിലെ വീട്ടുവളപ്പിൽ; വിടവാങ്ങിയത് ആധുനിക ശാസ്ത്രത്തെയും ജ്യോതിഷത്തെയും സമന്വയിപ്പിച്ച പരമാചാര്യൻ
ആലപ്പുഴ: പ്രഗത്ഭ ജ്യോതിഷപണ്ഡിതനും ഗണിത-ഊർജ്ജതന്ത്രജ്ഞനും ഗ്രന്ഥകർത്താവുമായ ഡോ. കെ. ബാലകൃഷ്ണ വാര്യരുടെ (87) നിര്യാണത്തിൽ പ്രമുഖർ അനുശോചിച്ചു. ഭൗതികശാസ്ത്രത്തിലും ഗണിതത്തിലും അഗാധ പാണ്ഡിത്യമുണ്ടായിരുന്ന അദ്ദേഹത്തിന്റെ വിയോഗത്തോടെ, കേരളീയ ജ്യോതിശാസ്ത്രത്തിലും പഞ്ചാംഗ ഗണിതത്തിലും ആധുനിക വാനശാസ്ത്ര നിരീക്ഷണങ്ങളെ സമന്വയിപ്പിച്ച ഒരു പരമാചാര്യനെയാണ് നാടിന് നഷ്ടമായത്.
ഹരിപ്പാട് നങ്ങ്യാർകുളങ്ങര പടിഞ്ഞാറെ വാര്യത്ത് ഡോ. കെ. ബാലകൃഷ്ണ വാര്യർ ഇന്നലെ (നവംബർ 18, ബുധൻ) ഉച്ചതിരിഞ്ഞാണ് അന്തരിച്ചത്. സംസ്കാരം ഇന്ന് (നവംബർ 19, വ്യാഴം) വൈകിട്ട് 3 മണിക്ക് നങ്ങ്യാർകുളങ്ങരയിലെ വീട്ടുവളപ്പിൽ നടക്കും.
ജ്യോതിഷശാസ്ത്രത്തെ ശാസ്ത്രീയമായ പഠനത്തിന്റെയും ഗവേഷണത്തിന്റെയും തലത്തിൽ അവതരിപ്പിക്കുന്നതിൽ സവിശേഷമായ സംഭാവനകൾ നൽകിയ പണ്ഡിതനായിരുന്നു അദ്ദേഹമെന്ന് കേരള ക്ഷേത്ര സംരക്ഷണ സമിതി സംസ്ഥാന പ്രസിഡന്റ് മുല്ലപ്പള്ളി കൃഷ്ണൻ നമ്പൂതിരി അനുശോചന സന്ദേശത്തിൽ പറഞ്ഞു. ജ്യോതിഷ-ക്ഷേത്രപഠന മേഖലകൾക്ക് അദ്ദേഹത്തിന്റെ വിയോഗം നികത്താനാവാത്ത നഷ്ടമാണെന്നും അദ്ദേഹം കൂട്ടിച്ചേർത്തു.
ഭൗതികശാസ്ത്രത്തിൽ ഉന്നതവിദ്യാഭ്യാസം നേടിയ ശേഷം കാനഡയിലെ സർവകലാശാലയിൽ ഗവേഷണം നടത്തിയ ഡോ. ബാലകൃഷ്ണ വാര്യർ, പന്തളം എൻ.എസ്.എസ്. കോളേജിൽ പ്രൊഫസറായി സേവനമനുഷ്ഠിച്ചു. സൂപ്പർ കണ്ടക്ടിവിറ്റി ഉൾപ്പെടെയുള്ള ആധുനിക ശാസ്ത്രശാഖകളിൽ പ്രാവീണ്യം നേടിയ അദ്ദേഹം, കഴിഞ്ഞ 28 വർഷമായി കേരള സർക്കാരിന്റെ ഔദ്യോഗിക ജ്യോതിഷിയായും സർക്കാർ കലണ്ടർ തയ്യാറാക്കുന്നതിനുള്ള കൺസൾട്ടന്റായും പ്രവർത്തിച്ചുവരികയായിരുന്നു.
പ്രശസ്ത ജ്യോത്സ്യനും പഞ്ചാംഗ രചയിതാവുമായ കോട്ടയം എറഞ്ഞാൽ വാര്യത്ത് പി.യു. കൃഷ്ണ വാര്യരുടെ മകനാണ്. ‘അനുഷ്ഠാന വിജ്ഞാനകോശം’, ‘വാസ്തു ജ്യോതിഷം’ തുടങ്ങിയ ശ്രദ്ധേയമായ ഗ്രന്ഥങ്ങളിലൂടെ ഭാരതീയ ശാസ്ത്രവിജ്ഞാനത്തെ പൊതുസമൂഹത്തിന് പരിചയപ്പെടുത്തി. കേരള ക്ഷേത്ര സംരക്ഷണ സമിതി, അഖില കേരള ജ്യോതിശാസ്ത്ര മണ്ഡലം എന്നിവയുടെ മുൻ സംസ്ഥാന പ്രസിഡന്റായും സമസ്ത കേരള വാര്യർ സമാജം ആലപ്പുഴ ജില്ലാ മുൻ പ്രസിഡന്റായും പ്രവർത്തിച്ചിട്ടുണ്ട്.
പത്നി: മായ ദേവി. മക്കൾ: മുക്ത, മഞ്ജു. മരുമക്കൾ: പി.ടി. രാധാകൃഷ്ണൻ, ഡോ. വി.വി. ഗിരി. കൊച്ചുമകൾ: അനഘ.
