പ്രമുഖ ചലച്ചിത്ര-സീരിയൽ താരം സന്തോഷ് കെ. നായർ വാഹനാപകടത്തിൽ അന്തരിച്ചു

BY :Ts Tvm

അടൂർ:

പത്തനംതിട്ട അടൂർ ഏനാത്ത് എം.സി. റോഡിലുണ്ടായ വാഹനാപകടത്തിൽ പ്രമുഖ ചലച്ചിത്ര-സീരിയൽ താരം സന്തോഷ് കെ. നായർ (65) അന്തരിച്ചു. ചൊവ്വാഴ്ച രാവിലെ ആറരയോടെയായിരുന്നു അപകടം. അദ്ദേഹം സഞ്ചരിച്ചിരുന്ന കാർ നിയന്ത്രണം വിട്ട് എതിരെ വന്ന പാഴ്സൽ ലോറിയിൽ ഇടിക്കുകയായിരുന്നു.

അപകടത്തെത്തുടർന്ന് പരിക്കേറ്റ അദ്ദേഹത്തെ അടൂരിലെ ലൈഫ് ലൈൻ ആശുപത്രിയിൽ പ്രവേശിപ്പിച്ചെങ്കിലും ചികിത്സയിലിരിക്കെ ഹൃദയാഘാതം സംഭവിക്കുകയായിരുന്നു. അപകടത്തിൽ കാറിലുണ്ടായിരുന്ന അദ്ദേഹത്തിന്റെ ഭാര്യ ശുഭശ്രീക്കും, ലോറി ഡ്രൈവർ സുധീഷിനും പരിക്കേറ്റിട്ടുണ്ട്. ഇവർ ചികിത്സയിൽ തുടരുകയാണ്.

1982-ൽ ‘ഇതു ഞങ്ങളുടെ കഥ’ എന്ന ചിത്രത്തിലൂടെ സിനിമാരംഗത്തെത്തിയ അദ്ദേഹം നൂറിലേറെ സിനിമകളിൽ വില്ലൻ, നായകൻ, സഹനടൻ, ഹാസ്യനടൻ എന്നിങ്ങനെ വൈവിധ്യമാർന്ന വേഷങ്ങൾ കൈകാര്യം ചെയ്തിട്ടുണ്ട്. നിലവിൽ തീയേറ്ററുകളിൽ പ്രദർശനം തുടരുന്ന ‘മോഹിനിയാട്ടം’ ആണ് അദ്ദേഹത്തിന്റെ അവസാന ചിത്രം. മലയാള സിനിമയുടെയും സീരിയൽ രംഗത്തിന്റെയും സജീവ സാന്നിധ്യമായിരുന്നു അദ്ദേഹം.