രണ്ടത്താണിയിൽ ദാരുണ സംഭവം: ഗേറ്റ് ദേഹത്ത് വീണ് അഞ്ചു വയസ്സുകാരന് ദാരുണാന്ത്യം By:TS Tvm

മലപ്പുറം :

മലപ്പുറം രണ്ടത്താണിയിൽ ഇന്നലെ വൈകുന്നേരം നടന്ന ദാരുണാപകടത്തിൽ അഞ്ചു വയസ്സുകാരന് ദാരുണാന്ത്യം. രണ്ടത്താണി ചെറുപറമ്പ് സ്വദേശി കുളത്തിൽ റഷീദിന്റെ മകൻ മുഹമ്മദ് മാസിൻ ആണ് മരണപ്പെട്ടത്. അയൽവാസിയുടെ വീട്ടിൽ അറ്റകുറ്റപ്പണിക്കായി അഴിച്ചുമാറ്റി വച്ചിരുന്ന ഇരുമ്പ് ഗേറ്റ് കുട്ടി കളിക്കുന്നതിനിടെ ദേഹത്തേക്ക് മറിഞ്ഞു വീഴുകയായിരുന്നു.

സംഭവത്തിൽ ഗുരുതരമായി പരിക്കേറ്റ കുട്ടിയെ ഉടൻ തന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. പോസ്റ്റ്‌മോർട്ടം നടപടികൾ പൂർത്തിയാക്കി മൃതദേഹം ഖബറടക്കി. കളിച്ചുനടക്കേണ്ട പ്രായത്തിൽ വിധി തട്ടിയെടുത്ത ഈ കുരുന്നിന്റെ വിയോഗം നാടിനെയാകെ വേദനയിലാഴ്ത്തിയിരിക്കുകയാണ്. അവധിക്കാലത്ത് കുട്ടികളുടെ സുരക്ഷ ഉറപ്പുവരുത്താനും അപകടസാധ്യതയുള്ള സാഹചര്യങ്ങളിൽ നിന്ന് അവരെ അകറ്റിനിർത്താനും രക്ഷിതാക്കൾ അതീവ ശ്രദ്ധ പുലർത്തണമെന്ന് ഈ സംഭവം ഓർമ്മിപ്പിക്കുന്നു.