കേരള സംസ്ഥാന ചലച്ചിത്ര അക്കാദമി ചെയർമാനായി നടൻ രവീന്ദ്രൻ; പ്രിയങ്ക നായർ വൈസ് ചെയർപേഴ്സൺ
തിരുവനന്തപുരം:
കേരള സംസ്ഥാന ചലച്ചിത്ര അക്കാദമിയുടെ സാരഥ്യത്തിലേക്ക് പ്രശസ്ത ചലച്ചിത്ര താരവും ഫെസ്റ്റിവൽ ക്യൂറേറ്ററുമായ രവീന്ദ്രനെ നിയമിച്ചു. ചലച്ചിത്ര രംഗത്തെ കലാപരവും സാങ്കേതികവുമായ മികവുകൾക്ക് കൂടുതൽ മുൻഗണന നൽകുന്നതിൻ്റെ ഭാഗമായാണ് പുതിയ ചെയർമാനെ സർക്കാർ ചുമതലപ്പെടുത്തിയത്. പ്രമുഖ നടിയും സാംസ്കാരിക രംഗത്തെ സജീവ സാന്നിധ്യവുമായ പ്രിയങ്ക നായരാണ് പുതിയ വൈസ് ചെയർപേഴ്സൺ.
ചലച്ചിത്ര അക്കാദമിയുടെ ഭരണസമിതിയും പുതുക്കി നിശ്ചയിച്ചിട്ടുണ്ട്. യുവ സംവിധായകൻ ജോഫിൻ ടി. ചാക്കോ, നടൻ സലിം ഹസ്സൻ എന്നിവരെ എക്സിക്യൂട്ടീവ് കമ്മിറ്റി അംഗങ്ങളായി തെരഞ്ഞെടുത്തു.
ഇവർക്ക് പുറമേ വിപുലമായ ജനറൽ കൗൺസിലും സർക്കാർ രൂപീകരിച്ചു. വൈക്കം വിജയലക്ഷ്മി, ധർമ്മജൻ ബോൾഗാട്ടി, ദീപു കരുണാകരൻ, ബി. രാകേഷ്, സക്കരിയ, സജീവൻ അന്തിക്കാട്, എം.വി. ഗിരീഷ്കുമാർ, വാഴൂർ ജോസ്, ആർ.എസ്. പണിക്കർ, സാബു ശങ്കർ, എ. കബീർ, ഷെർഗ സന്ദീപ്, അബ്ദുൾ ഹനാൻ എന്നിവരാണ് ജനറൽ കൗൺസിലിലെ മറ്റു അംഗങ്ങൾ.
