പാക് സൈന്യത്തിൻ്റെ ക്രൂരതക്കെതിരെ ലണ്ടനിൽ ബ്രിട്ടീഷ് കശ്മീരികളുടെ വൻ പ്രതിഷേധ മാർച്ച്

ലണ്ടൻ:

പാകിസ്ഥാൻ്റെ അധീനതയിലുള്ള ജമ്മു കശ്മീരിൽ (പി.ഒ.ജെ.കെ) പാക് സൈന്യം നടത്തുന്ന ക്രൂരമായ അടിച്ചമർത്തലുകൾക്കും മനുഷ്യാവകാശ ലംഘനങ്ങൾക്കുമെതിരെ ലണ്ടനിൽ ബ്രിട്ടീഷ് കശ്മീരികളുടെ വൻ പ്രക്ഷോഭം. ആയിരക്കണക്കിന് ആളുകൾ അണിനിരന്ന പ്രതിഷേധ മാർച്ച് ലണ്ടനിലെ പാർലമെൻ്റ് സ്ക്വയറിൽ നിന്ന് ആരംഭിച്ച് ട്രഫാൽഗർ സ്ക്വയറിൽ അവസാനിച്ചു. പാകിസ്ഥാൻ സൈന്യത്തിനെതിരെ വിപ്ലവം വേണമെന്ന ആഹ്വാനങ്ങളുമായാണ് കനത്ത ജനക്കൂട്ടം ലണ്ടൻ തെരുവുകളിൽ പ്രതിഷേധമുയർത്തിയത്.

പാക് അധീന കശ്മീരിൽ അവകാശങ്ങൾക്കായി പോരാടുന്ന ജോയിൻ്റ് അവാമി ആക്ഷൻ കമ്മിറ്റിക്ക് (ജെ.എ.എ.സി) പൂർണ്ണ പിന്തുണ പ്രഖ്യാപിച്ചായിരുന്നു മാർച്ച്. മേഖലയിൽ സാധാരണക്കാരുടെ മനുഷ്യാവകാശങ്ങൾ അടിയന്തരമായി സംരക്ഷിക്കപ്പെടണമെന്നും പാകിസ്ഥാൻ്റെ പിന്തുണയോടെ വളർത്തുന്ന ഭീകരവാദം അടിച്ചമർത്തണമെന്നും പ്രതിഷേധക്കാർ ഒരേസ്വരത്തിൽ ആവശ്യപ്പെട്ടു. ‘പാകിസ്ഥാൻ സൈന്യം പുറത്തുപോകുക’ എന്നതുൾപ്പെടെയുള്ള കടുത്ത മുദ്രാവാക്യങ്ങളാണ് ലണ്ടനിൽ മുഴങ്ങിക്കേട്ടത്. സമാധാനപരമായി പ്രതിഷേധിക്കുന്നവർക്ക് നേരെയുള്ള സൈനിക നടപടി, സാധാരണക്കാരുടെ കൊലപാതകം, സ്ത്രീകൾക്ക് നേരെയുള്ള അതിക്രമങ്ങൾ എന്നിവയിൽ ബ്രിട്ടീഷ് കശ്മീരികൾ കടുത്ത ആശങ്ക രേഖപ്പെടുത്തി.

തുടരുന്ന ജനകീയ പ്രക്ഷോഭങ്ങളും അടിച്ചമർത്തലും

പാക് അധീന കശ്മീരിലെ സമീപകാല സംഘർഷങ്ങൾ വ്യക്തമാക്കുന്ന പ്ലക്കാർഡുകൾ ഉയർത്തിപ്പിടിച്ചാണ് ജനങ്ങൾ നീതിക്കായി ശബ്ദമുയർത്തിയത്. കഴിഞ്ഞദിവസം ബ്രാഡ്‌ഫോർഡിലെ പാകിസ്ഥാൻ കോൺസുലേറ്റിന് പുറത്തും സമാനമായ രീതിയിൽ വലിയ പ്രതിഷേധ പ്രകടനങ്ങൾ നടന്നിരുന്നു. ഗോതമ്പ് സബ്‌സിഡി പുനഃസ്ഥാപിക്കുക, ജലവൈദ്യുത പദ്ധതികളിൽ നിന്നുള്ള വൈദ്യുതിക്ക് ന്യായമായ നിരക്ക് ഏർപ്പെടുത്തുക, പാക് അധീന കശ്മീർ നിയമസഭയിലെ 12 അഭയാർഥി സീറ്റുകൾ റദ്ദാക്കുക തുടങ്ങിയ ആവശ്യങ്ങൾ ഉന്നയിച്ച് മാസങ്ങളായി ജെ.എ.എ.സിയുടെ നേതൃത്വത്തിൽ അവിടെ ജനകീയ പ്രക്ഷോഭങ്ങൾ നടക്കുകയാണ്. എന്നാൽ ഈ ആവശ്യങ്ങൾ അംഗീകരിക്കാൻ പാക് ഭരണകൂടം തയ്യാറാകാത്തതാണ് നിലവിലെ പ്രതിസന്ധിക്ക് കാരണം.

ഭീകരവിരുദ്ധ നിയമപ്രകാരം ജോയിൻ്റ് അവാമി ആക്ഷൻ കമ്മിറ്റിയെ നിരോധിക്കാനുള്ള പ്രാദേശിക സർക്കാരിൻ്റെ തീരുമാനത്തിൽ ഹ്യൂമൻ റൈറ്റ്‌സ് കമ്മിഷൻ ഓഫ് പാകിസ്ഥാൻ (എച്ച്.ആർ.സി.പി) ഉൾപ്പെടെയുള്ള സംഘടനകൾ കടുത്ത ആശങ്ക പ്രകടിപ്പിച്ചിട്ടുണ്ട്. ജനകീയ പ്രസ്ഥാനങ്ങളെ നിരോധിക്കുന്നത് ജനാധിപത്യ ഇടം ഇല്ലാതാക്കുമെന്ന് എച്ച്.ആർ.സി.പി മുന്നറിയിപ്പ് നൽകി. അടുത്തിടെ പാക് അധീന കശ്മീരിലെ റാവലാക്കോട്ടിൽ പൊലീസും ജെ.എ.എ.സി പ്രവർത്തകരും തമ്മിലുണ്ടായ രൂക്ഷമായ ഏറ്റുമുട്ടലിൽ നിരവധി സാധാരണക്കാരും പൊലീസുകാരും കൊല്ലപ്പെട്ടിരുന്നു. ഇതിന് പിന്നാലെ കൂടുതൽ അർധസൈനിക വിഭാഗങ്ങളെ വിന്യസിച്ചും ഇൻ്റർനെറ്റ് സേവനങ്ങൾ പൂർണ്ണമായി റദ്ദാക്കിയുമാണ് പാക് ഭരണകൂടം ജനങ്ങളെ അടിച്ചമർത്തുന്നത്.