പുകയില ഉത്പന്നങ്ങളുമായി രണ്ടുപേർ ഡാൻസാഫും വഞ്ചിയൂർ പൊലീസും ചേർന്ന് പിടികൂടി

തിരുവനന്തപുരം:

നഗരത്തിൽ വൻതോതിൽ പുകയില ഉത്പന്നങ്ങൾ വിൽപന നടത്താൻ ശ്രമിച്ച രണ്ടുപേരെ ഡാൻസാഫും വഞ്ചിയൂർ പൊലീസും ചേർന്ന് പിടികൂടി. തിരുവനന്തപുരം സിറ്റി പൊലീസ് കമ്മീഷണർ കെ. കാർത്തിക് IPS-ന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ കർശന പരിശോധനയിലാണ് പ്രതികൾ വലയിലായത്.

വഞ്ചിയൂർ പൊലീസ് സ്റ്റേഷനിലെ റൗഡി ഹിസ്റ്ററി ഷീറ്റിൽ (RHS) ഉൾപ്പെട്ട പ്രതിയായ ബിജു എന്ന സ്കന്ദൻ (46) ആണ് മൂന്ന് ചാക്ക് നിറയെ ശംഭു, കൂൾ, മൗണ്ട് കൂൾ, ഹാൻസ് തുടങ്ങിയ നിരോധിത പുകയില-ലഹരി ഉത്പന്നങ്ങളുമായി തേങ്ങാപ്പുര ഭാഗത്തുനിന്ന് പിടിയിലായത്.

പേട്ടയിലും പൊലീസ് പരിശോധന:

തുടർന്ന് പൊലീസ് നടത്തിയ വിപുലമായ പരിശോധനയിൽ പേട്ടയിൽ നിന്നും പുകയില ഉത്പന്നങ്ങളുമായി മറ്റൊരാളെക്കൂടി പൊലീസ് കസ്റ്റഡിയിലെടുത്തിട്ടുണ്ട്. പിടിയിലായ പ്രതികൾക്കെതിരെ വഞ്ചിയൂർ പൊലീസ് ശക്തമായ നിയമനടപടികൾ സ്വീകരിച്ചു വരികയാണ്.

വരും ദിവസങ്ങളിലും തിരുവനന്തപുരം സിറ്റി പൊലീസ് ജില്ലാ പരിധിക്കുള്ളിൽ ലഹരി വിരുദ്ധ പരിശോധനകൾ കർശനമാക്കുമെന്നും, ലഹരി കച്ചവടം, കടത്ത് എന്നിവ നടത്തുന്നവർക്കെതിരെ ഗുണ്ടാ ആക്ട് ഉൾപ്പെടെയുള്ള കർശന നിയമനടപടികൾ സ്വീകരിക്കുമെന്നും സിറ്റി പൊലീസ് കമ്മീഷണർ അറിയിച്ചു.