വയനാട് തോൽപ്പെട്ടിയിൽ വൻ കുഴൽപ്പണവേട്ട; ഒന്നരക്കോടിയോളം രൂപയുമായി മൂന്ന് പേർ പിടിയിൽ
വയനാട്:
ജില്ലയിലെ തോൽപ്പെട്ടിയിൽ നടത്തിയ തിരച്ചിലിൽ ഒന്നരക്കോടിയോളം രൂപയുടെ കുഴൽപ്പണം പിടികൂടി. സംഭവത്തിൽ മൂന്ന് പേരെ തിരുനെല്ലി പൊലീസും ഡാൻസഫ് (DANSAF) ടീമും ചേർന്ന് അറസ്റ്റ് ചെയ്തു. കോഴിക്കോട് വടകര സ്വദേശി അമീന കൊട്ടേജിൽ പ്രഭു രാജ് (20), കണ്ണൂർ സ്വദേശി സ്വപ്നിൽ (23), മഹാരാഷ്ട്ര ഭാൽവാണി സ്വദേശി രാഹുൽ (26) എന്നിവരാണ് പിടിയിലായത്.
തോൽപ്പെട്ടി അതിർത്തി ചെക്ക്പോസ്റ്റിൽ നടത്തിയ വാഹന പരിശോധനയ്ക്കിടെയാണ് കർണാടക ഭാഗത്തുനിന്നും വന്ന കാറിൽ നിന്ന് പണം കണ്ടെത്തിയത്. കെഎ 13 Z 9121 എന്ന രജിസ്ട്രേഷൻ നമ്പറിലുള്ള വാഹനത്തിന്റെ ഡ്രൈവർ സീറ്റിന് അടിയിലായി പ്രത്യേക രഹസ്യ അറ നിർമ്മിച്ച് സൂക്ഷിച്ച നിലയിലായിരുന്നു പണം. ആകെ 1,44,50,000 (ഒരു കോടി നാൽപ്പത്തിനാല് ലക്ഷത്തി അൻപതിനായിരം) രൂപയാണ് വാഹനം തടഞ്ഞു നിർത്തി നടത്തിയ വിശദമായ പരിശോധനയിൽ പൊലീസ് പിടിച്ചെടുത്തത്. സംഭവത്തിൽ അന്വേഷണം പുരോഗമിക്കുകയാണ്.
