ഗുരുവായൂർ പുന്നത്തൂർ കോട്ടയിൽ ആനകളുടെ സുഖചികിത്സയ്ക്ക് തുടക്കമായി; ഔഷധക്കൂട്ടുമായി ഒരു മാസം നീളുന്ന പരിചരണം
തൃശ്ശൂർ:
ഗുരുവായൂരപ്പന്റെ ഗജവീരന്മാർക്ക് ഉന്മേഷവും ആരോഗ്യവും വീണ്ടെടുക്കാനുള്ള വാർഷിക സുഖചികിത്സയ്ക്ക് പുന്നത്തൂർ ആനത്താവളത്തിൽ തുടക്കമായി. റവന്യൂ (ദേവസ്വം) സെക്രട്ടറി എം.ജി.രാജമാണിക്കം ഐഎഎസ് ചടങ്ങ് ഉദ്ഘാടനം ചെയ്തു. ഗുരുവായൂർ ദേവസ്വം ആനകൾക്കായി നടത്തുന്ന ഈ സവിശേഷ പരിചരണം ലോകത്തിന് തന്നെ മികച്ചൊരു മാതൃകയാണെന്ന് അദ്ദേഹം അഭിപ്രായപ്പെട്ടു.
ദേവസ്വം കൊമ്പനായ ജൂനിയർ വിഷ്ണുവിന് ആദ്യ ഔഷധ ചോറുരുള നൽകിക്കൊണ്ടാണ് ഈ വർഷത്തെ സുഖചികിത്സയ്ക്ക് തുടക്കം കുറിച്ചത്. തുടർന്ന് പ്രശസ്ത ഗജവീരന്മാരായ വിനായകൻ, ഗോപീകൃഷ്ണൻ ഉൾപ്പെടെയുള്ള മറ്റ് ആനകൾക്കും പ്രത്യേക ആയുർവേദ കൂട്ടുകൾ അടങ്ങിയ ചോറുരുളകൾ വിതരണം ചെയ്തു.
ദേവസ്വം ചെയർമാനും മുൻ എം.എൽ.എയുമായ എ.വി.ഗോപിനാഥ് ചടങ്ങിൽ അധ്യക്ഷത വഹിച്ചു. ഭരണസമിതി അംഗങ്ങളായ ബ്രഹ്മശ്രീ മല്ലിശ്ശേരി പരമേശ്വരൻ നമ്പൂതിരിപ്പാട്, ബ്രഹ്മശ്രീ പി.സി.ദിനേശൻ നമ്പൂതിരിപ്പാട്, സി.മനോജ്, മനോജ് ബി. നായർ, എം.യു. ഷിനിജ എന്നിവരും പങ്കെടുത്തു. ആനകളുടെ ആരോഗ്യകാര്യങ്ങൾ നിരീക്ഷിക്കുന്ന വിദഗ്ധ സമിതി അംഗങ്ങളായ ഡോ. പി.ബി. ഗിരിദാസ്, ഡോ. എം.എൻ. ദേവൻ നമ്പൂതിരി, ഡോ. കെ. വിവേക്, ഡോ. യു. ഗിരീഷ്, ഡോ. ശബരീനാഥ് വി, നാകേരി വാസുദേവൻ നമ്പൂതിരി എന്നിവരും ചടങ്ങിൽ സന്നിഹിതരായിരുന്നു.
ആനത്താവളത്തിലുള്ള ആകെ 35 ആനകളിൽ മദപ്പാടുള്ളവയും ക്ഷേത്രത്തിലെ നിത്യേനയുള്ള ശീവേലി എഴുന്നള്ളിപ്പുകളിൽ പങ്കെടുക്കുന്നവയും ഒഴികെ 17 ആനകളാണ് ആദ്യദിന ചടങ്ങിൽ അണിനിരന്നത്. വരും ദിവസങ്ങളിൽ ഘട്ടം ഘട്ടമായി എല്ലാ ആനകൾക്കും ചികിത്സ ലഭ്യമാക്കും. വരും ദിവസങ്ങളിൽ കണിശമായ ആഹാരക്രമവും വിശ്രമവുമായി ജൂലൈ 30 വരെയാണ് ഈ പ്രത്യേക ആനയൂട്ട് പദ്ധതി തുടരുക.
