ഗുരുവായൂരിൽ വെർച്വൽ ക്യൂ ദർശനം വിജയം: ആദ്യ രണ്ട് ദിനങ്ങളിൽ മൂവായിരത്തിലേറെ ഭക്തർ ദർശനം നടത്തി

BY: PRANOB

ഗുരുവായൂർ:

ഗുരുവായൂർ ക്ഷേത്രത്തിൽ സുഗമമായ ഭക്തജന ദർശനം ഉറപ്പാക്കുന്നതിനായി പരീക്ഷണാടിസ്ഥാനത്തിൽ ആരംഭിച്ച വെർച്വൽ ക്യൂ സംവിധാനത്തിന് വൻ പ്രതികരണം. വെർച്വൽ ക്യൂ മാർഗ്ഗം ഏർപ്പെടുത്തിയ ആദ്യ രണ്ട് ദിവസങ്ങളിൽ മാത്രമായി മൂവായിരത്തിലധികം ഭക്തരാണ് ഭഗവദ്ദർശനം നടത്തിയത്.

ഓഗസ്റ്റ് 4 ചൊവ്വാഴ്ച ആരംഭിച്ച സംവിധാനം വഴി ആദ്യദിനം 1,482 പേരും, രണ്ടാം ദിനം 1,606 പേരുമാണ് ദർശനം നടത്തിയത്. ഈ രണ്ട് ദിവസങ്ങളിലായി ആകെ 4,800 ഓളം പേർ ഓൺലൈൻ വഴി മുൻകൂട്ടി ബുക്കിംഗ് പൂർത്തിയാക്കിയിരുന്നു.

ചൊവ്വ, വ്യാഴം ദിവസങ്ങളിൽ മണിക്കൂറിൽ 300 ഭക്തർ എന്ന തോതിൽ പ്രതിദിനം 2,400 പേർക്കാണ് വെർച്വൽ ക്യൂ വഴി പ്രവേശനം അനുവദിക്കുന്നത്. രാവിലെ 7 മണി മുതൽ ഉച്ചവരെയും, വൈകീട്ട് 4 മണി മുതൽ 5 മണിവരെയുമാണ് ദർശന സമയം.

പ്രധാന നിർദ്ദേശങ്ങൾ:

• വെർച്വൽ ക്യൂ വഴി ബുക്ക് ചെയ്ത ഭക്തർ രസീതിയുടെ പ്രിന്റൗട്ടും ബുക്കിംഗിനായി ഉപയോഗിച്ച അസൽ തിരിച്ചറിയൽ രേഖയും (ID Proof) കയ്യിൽ കരുതണം.
• അനുവദിച്ച സമയത്തിന് അര മണിക്കൂർ മുൻപ് തന്നെ കിഴക്കേനടയിലെ ക്യൂ കോംപ്ലക്സിന്റെ വടക്കേ അറ്റത്തുള്ള പ്രത്യേക വരിയിൽ റിപ്പോർട്ട് ചെയ്യേണ്ടതാണ്.

വരും മാസങ്ങളിലെ ദർശനത്തിനായുള്ള ബുക്കിംഗ് വിവരങ്ങളും സെപ്റ്റംബർ മാസത്തേക്കുള്ള വെർച്വൽ ക്യൂ ബുക്കിംഗും ഉടൻ തന്നെ ആരംഭിക്കും. ഗുരുവായൂർ ദേവസ്വത്തിന്റെ ഔദ്യോഗിക വെബ്സൈറ്റ് (https://guruvayurdevaswom.in/) മുഖേന ഭക്തർക്ക് മുൻകൂട്ടി ബുക്കിംഗ് നടത്താവുന്നതാണ്.